Meclîsa Partiya Jiyana Azad a Kurdistanê (PJAK) bi boneya 21’ê Sibatê Roja Zimanê Dayikê ya Cîhanî daxuyaniyek weşand.
Di daxuyaniya PJAK’ê de wiha hate gotin:
“21’ê Sibatê weke Roja Zimanê Dayikê ya Cîhanî hatiye diyarkirin. Gelê Kurd di cîhana îroyîn de bi parastina zimanê xwe yê zikmakî xwe û çanda xwe parastiye. Lê hîn jî gelê Kurd li rastî jenosîda çand û ziman tê. Şerê parastina zimanê Kurdî ji bo gelê Kurd yekane rêya parastina hebûn û pûçkirina jenosîda çandî ye.
Polîtîkayên her çar hikûmetên Îran, Tirkiye, Iraq û Sûriyeyê li hemberî gelê Kurd bi qedexekirina xwendin û nivîsandina zimanê dayikê, li ser bingehê paradîgmaya şovenist ku bi vê yekê hewl didin yek ziman, yek netew, yek dewlet, yek çand, yek dîrok û yek alayê li ser gelan ferz bikin. Ev zêdetirî ses salî ye ev polîtîkayên faşîst û şovenîst li dijî gelê Kurd tên bikaranîn. Lewra gûman ji wê yekê nîne ku gelê Kurd ji bo parastina ziman û çanda Kurdî di nav têkoşîneke bêhempa, bênimûne û fedayî de ye. Zimanê Kurdî hebûneke çandî ye ku bi wê rêyê dikare hemû mîratên dîrokê werin parastin. Lewra qedexekirina mafê xwendin û nivîsandina zimanê dayikê li ser bingehê polîtîkayên asîmîlasyonê wê bibe sedema tunebûna yasayên herêmî û cîhanî.
Pêşketin û belavkirina zimanê Kurdî û zaravayên wî bi sîyaset û stratejîyên ku prensîb û pîvanên cihêrengîya çandî di nav xwe de dihewîne, dikare pêk were. Helbet bi perwerdeyê her kes dikare zanîn û pisporiyeke temamtir bi dest bixe û ev yek jî bi perwerdeya bi zimanê dayikê pêkan e. Zimanê Kurdî yek ji pîvanên bingehîn yên hebûn û jiyana gelê Kurd e ku ji aliyê desthilatdaran ve bi her awayî tê înkarkirin û ji aliyê hikûmetên hegemonîk yên cîhanê ve jî hatiye astengkirin. Bi qedexekirina perwerdeya bi zimanê dayikê, mafê jiyana azad a gelê me binpê kirin. Ji ber vê yekê têkoşîna perwerdeya bi zimanê dayikê, têkoşîna azadiyê watedartir û bedewtir dike. Îro gelê Kurd bi têkoşîn û fedekariya xwe ya bêwestan ji qonaxa qirkirina fizîkî rizgar bûye û dem hatiye ku bi tevahî azadiya xwe dawî li siyaseta qirkirina çandî ya dijminan bîne. Bi ferzkirina “zimanê fermî” ji aliyê rejîmên faşîst ve bê guman derfeta avakirina civakeke azad ji gelên bindest ên Rojhilata Navîn re nehiştiye. Civaka azad ew e ku bi huner û wêjeyê nasnameya xwe ya çandî bi pêş bixe û xweş bike. Lewma ferzkirina zimanê fermî yê dewletên serdest li ser netewên bindest, mînakeke zelal ya qirkirina çandî ye. Di vê cîhana çêkirî de hemû dewlemendiyên çandî yên civakan tune dikin û mafê zimanê dayikê yê gelan nadin. Ji ber vê yekê ev maf bes bi têkoşîneke berdewam dikare bê bidestxistin.
Em weke Partiya Jiyana Azad a Kurdistanê (PJAK) Roja Zimanê Dayikê ya Cîhanî li hemû netewên bindest bi taybet gelê Kurd pîroz dikin û bang li hemû gelê Kurd dikin ku ji bo parastina zimanê Kurdî têkoşîna xwe bilind bikin û her malekê bikin dibistana ziman. Yekane rêya xilasbûna ji bindestiya etnîkî û çandî ev e. Axaftina bi zimanê zikmakî jî di warê parastina zimanê Kurdî de û di vê çarçoveyê de parastina mafên xwe yên çandî û pêşvebirina mafên me yên çandî erkeke bingehîn a her kesekî ye. Parastina zimanê Kurdî yek ji azadiya gelê me ye. Bijî civaka azad.”
