Tevgera Jinên Azad (TJA) bi wesîleya 25’ê Mijdarê Roja Têkoşîna Navneteweyî ya li dijî Tundiya li hemberî Jinê bi dirûşma “Bi civaka demokratîk ber bi jiyana azad a bê tundî ve” dest bi kar kir. Jinên ku bi deklarasyonekê ragihandin ku wê li qadan dest bi kar bikin, di vê pêvajoyê de wê balê bikişînin ser tundiya mêr û polîtîkaya bêcezahiştinê. Di daxuyaniyê de hate ragihandin ku bi avakirina pêvajoya aştî û civaka demokratîk re wê tundî kêm bibe û işaret bi tundiya dewlet û mêr a ji ber şer hate kirin. Aktîvîsta TJA’yê Xecê Oncu diyar kir ku ji bo avakirina cîhaneke bê tundî ji bilî afirandina aştiyê rêyeke din nîne û wê hesabê jinên hatin qetilkirin bipirsin.
Xecê Oncu ragihand ku bi demokrasyona weşandî re wan jiyaneke bê tundî, azad û demokratîk ji xwe re esas girtin û got, “Di avakirina civaka demokratîk de bêdengbûna çekan têrê nake, di heman demê de divê mirov nîqaş bikin ku jiyaneke bê tundî dikare çawa bê avakirin.”
‘DEKLARASYON BANGA JI BO JIYANE BÊ TUNDÎ YE’
Xecê Oncu destnîşan kir ku deklarasyona hate weşandin nexşerêyek ji bo jiyana jin, zarok, ciwanan a li nava civakeke demokratîk a dûrî ji tundiyê ye û axaftina xwe bi vî rengî dewam kir, “Dema ku em qala civaka demokratîk dikin, em hem azadiya şexsan hem jî hişmendiya jiyaneke bê tundî ji xwe re dikin esas. Em timî dibêjin, tundiya li hemberî jinê polîtîk e. Sîstemên netewe dewletê di tevahiya dîrokê de tundî bi taybetî li dijî jin û zarokan bi eşkere dewam kirin. Ev rewş veşartî nîne, rastiyeke bi rêk û pêk e ku bi sedan sal in dewam dike.” Xecê Oncu ragihand ku ji ber vê yekê di avakirina civakeke demokratîk de divê tundî bi her alî bê nîqaşkirin.
‘EM Ê BI MÊRAN RE LI SER TUNDIYÊ BIAXIVIN’
Li ser karên ku wê têkildarî 25’ê Mijdarê bikin jî Xecê Oncu got, “Em ê mal bi mal, tax bi tax bigerin. Em ê bi jinan, dayikan re li qadan bicivin. Di heman demê de em ê bi mêran re rûnên û li ser tundiyê, encamên tundiyê, bandora tundiyê li ser civakê biaxivin. Ji ber ku axaftina li ser tundiyê tenê bi jinan re têrê nake. Divê mirov bi tevahiya civakê re nîqaş bikin û rêyên çareseriyê bi hev re peyda bikin.”
Xecê Oncu anî ziman ku dehfdana civakê ber bi tundiyê ve ji polîtîkayên dewletê cuda nîne û destnîşan kir ku hem ji bo pêkhatina edaletê, hem jî ji bo bicihanîna polîtîkayên parastinê wê têkoşîna xwe dewam bikin.
‘JIN XWEDÎ BERPIRSYARIYEKÊ NE’
Xecê Oncu ragihand ku têkoşîna jinan di heman demê de tê wateya azadiya temamiya civakê û axaftina xwe bi vî rengî bi dawî kir: “Di avakirian civaka demokratîk de em jin barê vê yekê hildigirin. Jİ bo careke din bûyerên bi serê Gulistan Dokû, Rojîn Kabaîş hatine rû nedin, em hesab dipirsin. Em dixwazin jiyaneke dûrî ji tundiyê li bingeha civaka demokratîk bi cih bikin, vê yekê nîqaş bikin û bi piştevaniyê 25’ê Mijdarê îsal bi xurtî derbas bikin.”
