Di 27’ê Mijdara 1978’an de bi pêşengiya Rêber Apo komeke biçûk li gundê Fîsê ya Licê, bi armanca ku têkoşîna koma Apoyî bigihîne astek bilindtir û bîranîna hevrê Hekî Karer zindî bihêlin, bi biryareke dîrokî re Partiya Karkerên Kurdistanê (PKK) hate damezrandin. Gerîlayên YJA Star û HPG’ê bi vê wesîleyê ji ajansa me ANF’ê re axivîn.
‘DI BINGEHA PKK’Ê DE KEDA ŞEHÎDAN HEYE’
Gerîlaya YJA Starê Arîn Mîlad, salvegera damezrandina PKK’ê li Rêber Apo, şehîdên şoreşê û li hemû gelên ku dilê wan ji bo azadiyê lê dide pîroz kir. Arîn Mîlad, diyar kir ku damezrandina PKK’ê ji bo wan hebûn, mîlad û zayîneke nû ye û wiha got, “Eger ku Kurd îro bi zimanê xwe diaxifin û hebûna Kurd tê qebûl kirin, ev encama têkoşîna PKK’ê ye. Heya roja îro pir şehîd û kedeke mezin hate dayîn. Ev hemû maneviyeta PKK’ê ye. Armanca me ya sereke ew e ku em Rêbertî û gelê xwe re bibin bersiveke xurt. PKK’ê ne wekî berê ye, ji berê mezintir û berfirehtir bûye. Em jî wekî endamên Tevgera Apoyî em ê heta dawiyê bi mîras û maneviyeta ku bi xwîna şehîdan ve hatiye avakirin girêdayî bimînin û em careke din soza bilind kirina têkoşînê didin.”
‘WÊ TÊKOŞÎNA ME HETA AZADÎ MISOGER DIBE BIDOME’
Yek ji Gerîlayê HPG’ê yê enternasyonalîst Aras Zana, jî pêşî salvegera 47’emîn a damezrandina PKK’ê li mîmarê vê berxwedaniyê Rêber Apo pîroz kir û got, “Ez bi taybet ji bo malbatên şehîdan silav û hurmetên xwe rêdikim. Malbatên me pêwîste vî tiştî tu caran jibîr nekin ku şehîdên me ên ku bûne bingeha têkoşîna PKK’ê ew ê bi tîpên zêrîn herdem di dile me de bijîn. Di encama keda Rêber Apo û têkoşîna PKK’ê de em ji binê şûrê qirkirin û qetlîamê rizgarbûn û gihiştin vê rojê. Gelê Kurd bi têkoşîna Rêber Apo û PKK’ê re dîwarên şermê û dîwarên ku li hember rastiya wî hatibû avakirin şikand. Îro gelê Kurd bi serfirazî li hemberî bişavtin û dagirkeriyê disekinin û têkoşîna xwe digihînin lûtkeyê. Îro her çiqas em wek Tevgera Apo’yî têkoşîna xwe di ast û merhaleyeke cuda de dixwazin bidomînin jî, em ê herdem bi rihê 27’ê Mijdarê têbikoş in. Heta ku em azadiya Rêber Apo û gelê xwe misoger nekin, ew ê têkoşîna me bidome”
‘PKK’Ê ROJEK, VEJÎNEK Û SIBEROJEK SERKETÎ JI BO AZADIYA GEL AVA KIR’
Gerîlaya YJA Starê Evîndar Zagros jî ev tişt gotin, “Di sala 1978’an de Rêber Apo pêngaveke ku mohra xwe li sedsala 21’an xist, da destpêkirin. Ev pêngav heta roja me ya îro, tevî gelek zextên mezin jî bi ked û fedakariyeke pir mezin ji aliyê Rêber Apo ve hate pêş xistin û hate domandin. Ev têkoşîn di encama fedekariyên pir mezin a şehîdan de hat pêşdebirin. Şehîdên me ji bo azadiya gelan li ber xwe dan û hiştin ku ev pêngav bigîhêje heya vê rojê. Her çiqasî Rêbertî niha pêngavekî nû dabe destpêkirin jî di bingeha wê de ev rojên dîrokî, rojên berxwdaniya mezin heye û ew ê tu caran ev rastî neyê jibîrkirin. PKK’ê rojeke nû, vejîneke nû û siberojek serketî ji bo azadiya gelên bindest ava kir. Bi vê wesîleyê re em dubare bejna xwe li hemberî şehîdên me yên qehraman ên Tevgera Azadiyê bi hurmetî ditewînin û vê rojê dubare li tevahi Kurdistanê pîroz dikin.”
