Hevberdevkê DEM Partiyê Dogan Erbaş çûyîna ‘Komîsyona Çareseriyê’ ya Girava Îmraliyê nirxand û destnîşan kir ku hevdîtina bi navê komîsyonê bi Rêber Apo re hatiye kirin tê wê wateyê ku êdî bi pratîkî derbasî nava zemîna muzakereyê ya demokratîk bûne.
Erbaş destnîşan kir ku pêkhatina hevdîtinê bi biryara piraniya partiyên li meclîsê bi serê xwe girîng e û anî ziman ku ev yek sembolîk nîne; divê weke nêta ji bo meşandina muzakereyê bi naskirina hebûn û îradeyê bê nirxandin. Her wiha ragihand ku ev gav xwedî girîngiyeke dîrokî ye, firsendek afirandiye.
‘SEMBOLÎK NÎNE, TÊ WATEYA NASKIRINA ÎRADEYÊ Û MEŞANDINA MUZAKEREYÊ’
Dogan Erbaş bangên Rêber Apo yên berê bi bîr xist ku ji bo avakirina komîsyonê li meclîsê kir û işaret bi destpêka pêvajoya muzakereyê ya demokratîk kir:
“Di pêvajoya çareseriyê ya 2012’an de jî Birêz Ocalan bangeke bi heman rengî kiribû. Xwestibû li meclîsê komîsyonek bê avakirin, ev komîsyon îradeya siyasî ya civakê temsîl bike û bi wî re hevdîtinê bike. Di vê demê de jî, ji Cotmehê û vir ve di hevdîtinên bi heyetên me re timî destnîşan kir ku ew girîng dibîne ku meclîs bikeve dewrê, ne tenê partiyên desthilatdariyê her wiha hemû partî tevlî pêvajoyê bibin.
Tevlîbûna CHP’ê li nava komîsyonê bi taybetî destnîşan kiribû. Niha em dikarin bi hêsanî bibêjin ku derbasbûna li nava zemîna muzakereyê ya demokratîk çêbûye. Heyeta hevdîtinê di asta tê xwestin de nebe jî hevdîtin bi biryara piraniya partiyên li meclîsê têne temsîlkirin pêk hat. Ev yek bi tena serê xwe girîng e.
Hevdîtina Birêz Ocalan a bi organa qanûndanînê re destpêka muzakereyên demokratîk e. Gavên ji niha û pê ve wê her wiha bêne nirxandin. Ev hevdîtin sembolîk nîne, naskirina îradeyê ye, ji bo meşandina muzakereyê destpêkeke dîrokî ye.
Em ê di rojên pêş de bibînin ku heyet wê bi endamên heyî yan jî bi yên nû wê careke din biçe yan na. Di civîna komîsyonê de tekez ev mijar wê bê nirxandin. Partiya me wê di vê mijarê de helwesta xwe diyar bike. Hevseroka me ya giştî Tulay Hatîmogûllari jî di civîna komê de nirxandineke bi berfirehî kir. Em ê bixwazin ku bi navê komîsyonê hevdîtin dewam bike, heyet careke din biçe Îmraliyê.”
‘XALA AŞTÎ Û CIVAKA DEMOKRATÎK A DI DAXUYANIYÊ DE’
Dogan Erbaş bal kişand ser girîngiya daxuyaniya Serokê Meclîsê Nûman Kûrtûlmûş û bi bîr xist ku di daxuyaniyê de pênaseya aştî û civaka demokratîk da pêş: “Daxuyaniya kurt a Serokê Meclîsê girîng bû. Banga aştî û civaka demokratîk destnîşan kir, qala yekbûna civakî kir, bal kişand ser Peymana 10’ê Adarê ya li Bakur û Rojhilatê Sûriyeyê ye. Ev balkêş bûn. Li şûna gotinên terorê pênaseyên aştiya civakî, xwişk û biratî û jiyana hevpar derkete pêş.
Ev daxuyanî işaretê bi wê yekê dike ku ji bo pêvajo debasî aştî û demokrasiyê bibe wê karên qanûnî û destûra bingehînî bêne kirin. Di pêvajoya ji niha û pê ve de wê gotinên Serokê Meclîsê li ber çavan bêne girtin.”
‘GOTINA BAHÇELÎ KU DIGOT MUXATABÊ HERÎ CIDÎ LI ÎMRALIYÊ YE, XWEDÎ GIRÎNGIYEKE CUDA YE’
Erbaş anî ziman ku helwesta Serokê Giştî yê MHP’ê Devlet Bahçelî balkêş e û got, “Nixandinên Birêz Bahçelî her wiha girîng e. Berê gotinên xwe cuda jî be nuqteya ku îro hatiye ji aliyê dîroka diyasî ve hêjayî nirxandinê ye. Bi taybetî gotina ‘Muxatabê herî cidî li Îmraliyê ye’ xwedî girîngiyeke cuda ye. Piştî ku agahî ji alîkarê xwe yê serokê giştî yê hevdîtin pêk anî wergirt, ev daxuyanî da. Lewma hîn bêhtir hêja û balkêş e.
Ocalan demeke dirêj bû samîmiyet û cidiyetê destnîşan dikir; Ev gotinên Bahçelî ew nêzîkatî bi bîr xist. Her wiha gotina, ‘Eger kes neçe ez ê biçim’ tevkarî li bilezbûna pêvajoyê kir. Ev gotin di heman demê de weke rexneyek li desthilatdariyê bû.
Helwesta Bahçelî nîşan dide ku li şûna pêvajo ji demê re bê hiştin, dixwaze gavên pratîkî bêne avêtin. Bi dîtina min, ji niha û pê ve wê Ocalan yekser muxatab bibînin.”
Dogan Erbaş diyar kir ku nîqaşên li ser tevlînebûna CHP’ê ya li hevdîtinê divê girîngiya hevdîtinê nenixumîne.
Erbaş got, “Ez di wê baweriyê de me ku CHP wê di rojên pêş de piştî van nîqaş û rexneyan helwesta xwe biguherîne. Weke partiyeke ku saleke qala guherîn û veguherînê dike û hewl dide hesabê ji rabirdûya xwe bipirse, nabe ku vê xetê dewam bike. Haya xwe ji wan serketinan heye ku bi piştgiriya gelê Kurd di rêveberiyên xwecihî de bi dest xistiye. Ji ber vê yekê wê neçar bimîne ku tevlî pêvajoyê bibe.
Herî dawî vê yekê bibêjim: Divê mîsyon, fikir, îradeya çareseriya demokratîk a Birêz Ocalan bi berfirehî ji raya giştî re bê vegotin. Ji bo jiyana hevpar û aştiya mayinde derdorên siyasî divê xwe ji jiberên xwe rizgar bikin û bi vî rengî nêzîk bibin.”
