Têkildarî êrişên Îranê yên li ser Başûrê Kurdistanê Platforma Yekîtiya Neteweyî ya Jinên Kurd ya Başûr daxuyaniyek belav kir.
Daxuyanî wiha ye:
“Ji bo raya giştî û gelê serbilind ê Kurdistanê
Careke din, destê reş ê dagirkeran û dijminên azadiyê, komek ji zarokên têkoşer û welatparêzên Rojhilatê Kurdistanê kir armanc. Di encama êrişa rejîma Îranê ya li ser Herêma Kurdistanê de, komek pêşmergeyên qehreman û şopdarên rêya rizgariyê şehîd bûn. Êrişa dagirkeran û şehîdkirina zarokên neteweya me, belgeyeke herî zelal û bêguman a li ser berdewamiya siyasetên tepisandinê yên ku dixwazin vîna gelê me ya ji bo azadî û serfiraziyê bişkînine.
Wek Platforma Yekîtiya Neteweyî ya Jinên Kurd, em vê sûcê nemirovane bi tundî şermezar dikin û ji kûrahiya dilê xwe sersaxiyê didin xwe, malbatên serbilind ên şehîdan, hevalên wan ên çeperê û tevahiya gelê serhildêr û têkoşer ê Rojhilatê Kurdistanê. Dîroka xebata azadîxwaziya gelê me îspat kiriye ku xwediyên vê axê ji bo bidestxistina mafên xwe yên rewa û sepandina dadperwerî û wekheviyê, her tim amadeyî qurbanîdanê bûne. Jinên Kurd, wekî hêzeke pêşeng di vê xebata neteweyî û demokratîk de, her tim di rêza pêşî ya qurbanîdan û berxwedanê de bûne. Ew êşa her dilopeke xwîna pêşmergeyekî wekî êşa xwe û wekî parçeyek ji karwana xwe ya bêrawestan a ber bi azadiyê ve dibînin. Ev berdêlên giran ên ku gelê me di çarçoveya Kurdistanê de dide, divê bibe bingeha xurtkirina yekîtî û yekrêziya navbera tevahiya hêz, aliyên siyasî û rêxistinên sivîl de. Bersiva rastîn a ji bo xwîna pak a van şehîdan, tenê û tenê bi rêya afirandina yekdengiya neteweyî û berdewamkirina li ser rêbaza wan a pîroz pêkane.
Peyama me ji bo dagirkeran zelale: Çek, tundî û şehîdkirina zarokên me nikare agirê şoreşê û daxwaza azadiyê di dilê her ferdekî Kurd de vemirîne. Xwîna van şehîdan moralê têkoşeran bilindtir dike û baweriya me ya bi serkeftinê kûrtir dike. Em bi rêzgirtina li ber gora pîroz a şerefbilindên rêya azadiya Kurdistanê serê xwe ditewînin. Jin, Jiyan, Azadî û xebata me heta serkeftinê berdewam wê bike. Nemir û herdem geş be navê şehîdên rêya azadiya Kurdistanê, rûreşî ji bo dagirker û dijminên gelê Kurd re.”
