Li Perûyê li dijî cînayetên li welêt zêde dibin û bûyerên xesp û tundiyê li bajarên weke Lima, Arequipa, Cusco û Punoyê bi hezaran kes daketin kolanan. Di encama şer û pevçûnan de herî kêm kesekî jiyana xwe ji dest da û zêdetirî 100 kes jî birîndar bûn ku hate ragihandin piraniya birîndaran ji polîsan pêk tê.
Serokdewletê nû yê Perûyê Jose Jeri daxuyaniyek da û da zanîn ku 55 polîs û 20 welatiyên sivîl birîndar bûne.
Protesto, li dijî krîza ewlehiya welêt ya zêde dibe û xemsariya dewletê ya li hemberî vê yekê tên lidarxistin. Bi taybetî jî tevgera ‘’Gen Z’’ a ji aliyê ciwanan ve hatiye avakirin û veguheriye pêleke navneteweyî, di mitîngan de alên ‘’One Peice’’ rakirin û sembolên li dijî dewletê bi kar anîn.
LI HEMBERÎ SEROKDEWLETÊ NÛ BERTEKA ‘DESTDIRÊJIYÊ’
Di xwepêşandanên li bajarê Limayê de hin koman hewl dan ku barîkatên li pêşiya bînaya Kongreyê derbas bibin, polîsan jî bi cop û xaza îsotê mudaxe kir. Herî kêm 10 kes hatin binçavkirin.
Rêxistinên femînîst jî beşdarî çalakiyan bûn û li hemberî Serokdewletê nû Jose Jeri ku derheqê wî de sûcdariya destdirêjiyê heye, nerazîbûnên xwe nîşan dan. Jinan pankarteke mezin ya bi nivîsa; ‘’Jose Jeri, serokê Perûyê destdirêjî kiriye’’ vekirin.
Hate ragihandin ku di xwepêşandanên hefteyên dawîn de bi tevahî nêzîkî 150 kes birîndar bûne.
