Parlamentera Mêrdînê ya DEM Partiyê Bêrîtan Guneş Sîstema Enerjiya Ba (RES), Sîstema Enerjiya Rojê (GES) û projeyên madenê yên li herêmê ji ANF’ê re nirxand.
Bêrîtan Guneş anî zima ku li Dersimê, Mêrdînê û gelek herêmên girîng ên Kurdistanê polîtîkaya têkbirina xwezayê tê meşandin û got, “Ev desthilatdarî xwezayê ne weke ‘hebûn’ekê, lê weke ‘çavkaniyekê’ dibîne, lewma hemû astengiyên qanûnî yên li pêşiya polîtîkayên qirkirinê têne rakirin.
Pêvajoyên Nirxandina Bandora wê ya li Xwezayê (ÇED) vediguherin prosedureke ji rêzê. Di oxira talankirina xweayê de ku ji bo Dersimê û Dersîmiyan pîroz e, li Pîlemûriyê çêkirina ocaxeke madenê tê ferzkirin. Li Şirnexê daristan têne tinekirin û bi hevkariya leşker, cerdevan û sermayeyê her roj dar têne birîn; bi qadên petrol û madenê xweza tê wêrankirin, bi ‘bendavên ewlekariyê’ avê weke çekekê bi kar tînin.”
Bêrîtan Guneş bi bîr xist ku li Gimgimê jî bi rêya JES’ê zext li gundiyan tê kirin ku ji cih û warê xwe bibin û got, “Li Mêrdînê jî tê xwestin ku li ser çêrgeh û zeviyên çandiniyê GES û RES bêne avakirirn. Bi karên ocaxa kevir û madenkariyê metirsî tê afirandin ku erdhejên sûnî rû bidin, zerar bigihêje ava binê erdê, qadên dîrokî yên weke Keleha Rabatê û Sûlava GAP’ê bêne wêrankirin û hewa bê çikandin. Her wiha Holdînga Etî Bakir û Cengîz heye ku di serî de Şemrex li Mêrdînê sond xwariye ku hewayê, avê, axê gemarî bike. Dibêjî qey ya ku heta niha kiriye têrê nake, hewl didin tesîsên nû ava bikin. Yanî şerekî topyekûn li dijî xwezayê tê meşandin. Divê ev yek tenê weke meseleyeke qirkirina ekolojiyê neyê dîtin.”
Parlamentera DEM Partiyê ragihand ku ev proje û hewldan xizmetê ji qirkirina civakê re jî dike û axaftina xwe bi vî rengî dewam kir, “Mirov ji cih û warê xwe dibin ku çavkaniya wan a debarê ye. Ji xaka xwe, ji hewa û ava xwe bêpar têne hiştin û têne sirgûnkirin.”
