Dayika Aştiyê Kûdret Eryilmaz anî ziman ku Rêber Apo û Tevgera Azadiyê ya Kurdistanê ji boa ştiyê sê gavên bingehîn ên pêwîst li pey hev avêt, bi vî rengî berpirsyariya xwe bi cih anî û destnîşan kir ku divê êdî dewlet tavilê gavê biavêje.
Li ser banga Rêber Apo li Şikefta Casenê gaveke dîrokî hate avêtin; Koma Aştî û Civaka Demokratîk bi merasîmekê çekên xwe şewitand. Gelek siyasetmedar, nûnerên rêxistinên civakî yên sivîl, rewşenbîr, nivîskar û malbatên şehîdan amade bûn. Yek ji kesên di merasîmê de amade bûn Dayika Aştiyê Kûdret Eryilmaz bû. Kûdret Eryilmaz ku dayika du şehîdan e ji ANF’ê re axivî.
Kûdret Eryilmaz anî ziman ku piştî 26 salan dema ku dîmenê Rêber Apo dît bi heyecan û hestewar bû û got, “Kêliyeke dîrokî bû ku me dengê Rêberê xwe bihîstin.”
‘GAVA KU GERÎLA XWE BERDAN JÊRÊ, EZ GELEKÎ HESTEWAR BÛM’
Kûdret Eryilmaz têkildarî merasîma şewitandina çekan got, “Hem bi kelecan bûm hem jî hestewar bûm. Min ji bo vê xakê du zarokên xwe ji dest da. Dayika du şehîdan im. Zarokekî min li Kobanê, yek jî li Mûşê şehîd bû. Li gel vê êşa xwe ya giran dema ku çûm wê derê û dema min dît ku gerîla xwe berdide jêrê, gelekî hestewar bûm. Em 7 dayik li wir bûn, me hemûyan jî zarokên xwe ji dest dabûn, dema ku me dît ew hatin, weke ku me zarokên xwe dîtibin, weke ku zarokên me bi wan re dimeşiyan, welê li me hat. Me gelekî dixwest wan hembêz bikin, lê belê nebû. Vê pêvajoyê li ser banga Rêber Apo destpê kir. Besê Hozat û hevalên wê piştî daxuyanî qediya çekên xwe şewitandin. Wê kêliyê weke ku dilê me jî avêtin nava wî agirî, ji ber ku ew çek mîrateya şehîdên me bû. Piştre em fikirîn û me got; Rêber Apo eger biryar li ser vê yekê dabe, wê demê ji bo başiya me hemûyan e. Rêber Apo û PKK’ê sê gavên dîrokî li pey hev avêtin û wezîfeya xwe bi cih anîn. Êdî dor hatiye dewleta Tirk; divê tavilê berpirsyariya xwe bi cih bîne.”
‘EV YEK JI BO ME HEMÛYAN ŞENSEKÎ MEZIN E’
Kûdret Eryilmaz destnîşan kir ku ji bo pêvajoya aştiyê bi rengekî erênî bimeşe, gavên hikumetê wê diyarker bin û got, “Em bi sedan salan şer bikin jî dawiya vî şerî aştî ye. Teqez wê aştî be. Em di wê baweriyê de ne ku destê aştiyê yê Rêber Apo wê li hewa nemîne. Ev yek ji bo me hemûyan şensekî mezin e. Divê dewlet vê şensê ji dest nede. Divê tavilê wezîfeya xwe bi cih bîne. Rijandina vê xwînê divê bisekine. Em dayik amade ne ku berpirsyariya xwe bi cih bînin. Li gel ku me zarokên xwe ji dest dane, em piştgiriyê didin pêvajoya aştiyê. Em naxwazin dayikeke din heman êşê bikişîne. Ji vê der^ebang li rayedaran dikim; rijandina vê xwînê êdî rawestînin. Ji vê derê bang li dayikên polîs û leşkeran dikim; werin em bi hev re ji bo pêvajoya aştiyê bibin pirek. Herî zêde me dayikan êş kişandin. Li gel her tiştî jî herî zêde em daxwaza aştiyê dikin.”
