Rêveberiya Xweseriya Demokratîk têkildarî mijarê li ber avahiya rêveberiyê ya li Reqayê daxuyaniyek da çapemeniyê. Daxuyanî bi zimanê Erebî û Kurdî hat dayîn.
Hevseroka Meclisa Rêveber Evîn Siwêd daxuyaniya bi Kurdî xwend.
Daxuyanî wiha ye:
“Di serî de em rûxandina rejîma zalim a Sûriyeyê li hemû gelê Sûriyeyê pîroz dikin û gelê me yê ku di oxira azadî û wekheviyê de tişta herî giranbuha da, silav dikin. Piştî 14 salan ji têkoşîn û pevçûnan, rejîma Sûriyeyê ya zalim bi hemû sazî û artêşa xwe ve, hate hilweşandin. Vê rejîmê nasnameyên neteweyî û çandî yên pêkhateyên Sûriyeyê paşguh dikir, siyaseta binpêkirinê li dijî hêza demokratîk dimeşand û mafên gelên Sûriyeyê înkar dikir.
Wê netewperestî, olperestî û mezhebperestî esas girt û bû sedem ku Sûriye ber bi rewşên xirab ve biçe. Ew bû sedema kuştina bi sed hezaran û koçberkirina bi milyonan ji gelê Suriyeyê. Me weke pêkhateyên Bakur û Rojhilatê Sûriyê ku herêmên me yek ji herêmên Sûriyeyê yên herî zêde rastî zilm û neheqiyê dihatin, ji bo parastina gelê xwe bi hezaran şehîd dan, me êş kişand û em em rastî gelek binpêkirinan hatin.
Di salên borî yên şoreşê de, tevî hemû hewldanên herêmî û navneteweyî yên ji bo dîtina çareseriyek ji pirsgirêkên Sûriyeyê yên bi rêyên aştiyan jî, lê rêjîmê siyasetên xwe yên dûrxistinê berdewam kirin û ji diyaloga cidî û çêker dûr ket. Siyaseta kirîna demê ji bo vekirina rê li ber mezinbûna kirîza Sûriyeyê bi awayekî zêdetir, esas girt. Sedema tişta ku niha Sûriye dijî jî vedigere vê rejîma bêserûber.
Wekî Rêveberiya Xweseriya Demokratîk a Herêma Bakûr û Rojhilatê Sûriyê, di nava salên kirîzê de me hemû derfeta xwe da peydakirina çareseriyeke aştiyane ya ji bo dozên li Sûriyeyê, lê rejîma Sûriyeyê bersiva vê xebatê neda û ji ber wê jî ew berpirsa bûyerên ku îro li Sûriyeyê diqewimin e.
EM GIRÊDAYÎ PÎVANAN E
Em diyar dikin ku em girêdayî pîvanên ku me di heyama borî de li ser wan kar kiriye ne.
Em wek beşek ji pêkhate û ji erdnîgariya Sûriyeyê dê ji bo parastina yekîtiya gelê Sûriyeyê û yekrêziya axa Sûriyeyê, kar bikin. Em ê zimanê diyaloga aştiyane ji bo çareserkirina pirsgirêkan bêyî dûrxistina ti aliyekî li Sûriyeyê, esas bigirin.
Em teqez dikin ku em ê di avakirina Sûriyeke demokratîk û pirreng a ku mafên hemû gelên Sûriyeyê bêyî cûdahî misoger bike de, roleke pêşeng bilîzin.
Em bang li hemû hêzên siyasî yên li Sûriyeyê dikin ku demên berê bînin ber çavan û dersan jê derxînin, her wiha ji bo derxistina welat ji aloziyê, bixebitin.
EM BI HEV RE XIZMETA BERJEWENDIYÊN HEMÛ GELÊN SURIYEYÊ BIKIN
Werin em vê qonaxê bikin rûpeleke nû ku em bi hev re hevkariyê bikin da ku em bigihîjin lihevkirinên ku xizmeta berjewendiyên hemû gelên Sûriyeyê bike. Em bang li her kesî dikin ku dûrî siyaseta dûrxistin û paşguhkirinê ku rejîma Sûriyeyê di demên borî de esas girt, bisekinin.
Em wekî Rêveberiya Xweseriya Demokratîk a Herêma Bakur û Rojhilatê Sûriyê ji diyalogê re amade ne, em destê xwe didin hemû aliyên Suriyeyê da ku bi hevre em nîşaneyên Sûriya pêşerojê, xêz bikin.”
