Rêveberiya Xweseriya Demokratîk a Bakur û Rojhilatê Sûriyeyê, fermandarên QSD’ê û rayedarên Hikumeta Demkî ya Sûriyeyê doh êvarê li Helebê li hev rûniştin.
Di hevdîtinê de bicihanîna peymana beriya niha li ser taxên Şêxmeqsûd û Eşrefiyê hatibû mohrkirin, hate nirxandin û mijara daxistina rageşiya li herêmê hate nîqaşkirin.
Aliyan lihev kirin ku ji bo bicihanîna peymana ji 14 xalan a ku 1’ê Nîsanê hatibû mohrkirin, gav bêne avêtin.
Di hevdîtinê de her wiha mekanîzmaya avakirina komîteyên hevpar ên şopandina bicihanîna peymanê kete rojevê.
Aliyan her wiha lihev kirin ku Hikumeta Demkî zêdekirina leşkerî ya li herêmê rawestîne, ihtimala şer û rageşiyê bi dawî bike û di navbera komîteyên pêwendîdar de civîn bi rêk û pêk bêne kirin.
