Salvegera 14’emîn a Şoreşa Rojava ya 19’ê Tîrmehê li gelek bajarên Bakur û Rojhilatê Sûriyeyê bi girseyî hate pîrozkirin.
KOBANÊ
Bi hezaran kes ji şêniyên bajarê Kobanê, nûnerên saziyên Rêveberiya Xweser, rêxistinên civaka sivîl, partiyên siyasî, şervanên Yekîneyên Parastina Jin (YPJ) û gaziyên şer, tevî şandeyekê ji herêma Cizîrê salvegera 14‘emîn a Şoreşa Rojava pîroz kir. Pîrozbahî li Stadyuma Şehîd Bawer Agir a li bajarê Kobanê bi dirûşma “Bi rihê Berxwedana 14‘ê Tîrmehê em ê xwedî li Şoreşa Rojava derkevin” hat birêxistinkirin.
Beşdaran alên şoreşê û posterên Rêber Apo hildan. Şahî bi deqeyeke rêzgirtinê dest pê kir û piştre gelek axaftin û peyamên girîng hatin pêşkêşkirin.
Hevserokê Meclisa Rêveber a li Kobanê Ferhan Hec Îsa di axaftina xwe de got, wê Kobanê rola xwe ya pêşeng û stratejîk biparêze û ji bo vê jî tê bikoşe.
Ji fermandarên YPJ’ê Dilbirîn Kobanê jî bal kişand ser salvegera şoreşê û wiha got: “Me bi têkoşîn û serhildanê karibû nasnameya xwe weke jin û weke gelê Kurd misoger bikin ku ev yek ji bajarê Kobanê destpêkir. Hebûna me weke gelê Kurd li Kobanê dest pê kir, ji ber vê yekê jî niha Kobanê di heman astê de rola xwe dilîze.”
Dilbirîn Kobanê pîrozbahî diyarî giyanê têkoşerên şoreşê kir û wiha berdavam kir: “Gelê me bi dehan û bi sedan zarokên xwe fedaî vê axê kirin. Bi taybetî gelê Kobanê dîrok bi xwîna zarokên xwe nivîsand. Ji bo vê jî bila tu alî propagandaya xwe li ser ked û xwîna vî gelî neke. Em li vir ruhê tevahî cangoriyên azadiyê zindî dikin, ji ber vê jî di vê şahiyê de em sozên xwe nû dikin. Lewma em vê şahiyê diyarî giyanê tevahî şehîdên ku canê xwe fedaî vê şoreşê kirine dikin.”
Piştre li gorî bernameyê, şahî bi pêşkêşkirina berhemên komên hunerî yên Kobanê; Koma Botan, Koma Şehîd Esmer û komên govendê dewam kir. Di heman demê de ji herêma Cizîrê hunermend Baran Dilbihar û ji derveyî Rojavayê Kurdistanê hunermend Berbang Hilat derketin ser dikê.
Şahî bi gerandina xelekên govendê, bi dirûşme û tilîliyên jinan bi dawî bû.
TIL TEMIR
Bi sedan kes ji şêniyên bajarên Til Temir û Zirganê salvegera şoreşê li pêşiya avahiya Meclisa Malbatên Şehîdan a bajarê Til Temirê pîroz kir. Nûnerên saziyên sivîl, partiyên siyasî, rewşenbîr û mabatên şehîdan tevî girseyek mezin a şêniyan pîrozbahiyê bûn.
Piştî deqeya rêzgirtinê hevserokê Meclisa Bajarê Til Temirê Xalid El Xelef axivî.
Xalid El Xelef anî ziman ku Şoreşa 19‘ê Tîrmehê qonaxeke nû ya rêveberiyên xwecih û beşdariya civakî ava kir.
El Xelef li dijî pirsgirêkên siyasî û ewlehiyê jî banga parastina destekftiyên şoreşê û xurtkirina yekitiyê kir.
Hevseroka Meclisa PYD‘ê ya bajarê Zirganê Semah El Hemadî jî diyar kir ku rêgezên Şoreşa 19‘ê Tîrmehê bingeha avakirina Sûriyeyeke demokratîk a pirreng e.
Semah El Hemadî di axaftina xwe de ji bo çareseriyeke siyasî ku mafan û edaletê ji bo tevahî Sûriyeyan mîsoger bike banga domandina xebata hevpar û diyalogê kir.
Piştî axaftinan hunermend Aycan Kobanê, Koma Şoreş û hunermend Yara Ehmed stran gotin. Beşdaran govend gerandin û dirûşme berz kirin.
GIRKÊ LEGÊ
Şêniyên bajarên Girkê Legê, Rimêlan û Çilaxayê salvegera Şoreşa Rojava bi şahiyekê li pêşiya Navenda Çand û Hunerê ya Aram Tîgran a li Rimêlanê pîroz kir.
Şahî bi deqeyeke rêzgirtin dest pê kir. Piştre ji rêveberên PYD‘ê Mihemed Ebdurehîm axivî û salvegera Şoreşa Rojava li tevahî pêkhateyên herêmê pîroz kir.
Mihemed Ebdurehîm diyar kir ku Şoreşa Rojava şoreşa aştî û jiyana hevbeş e, li hemberî şoreşê gelek êriş û astengî derketin, lê bi berxwedana şervanan û hevgirtina gelên herêmê êriş û astengî têk çûn.
Ebdurehîm di dewama axaftina xwe de îşaret pê kir ku felsefeya Rêber Abdullah Ocalan nirxên jiyana hevbeş û xwişk û biratiya gelan sepand. Her wiha bang naskirina mafên hemû pêkhateyan, Şoreşa Rojava û fedakariyên şehîdan kir û got: “Me ji bo bidestxistina mafên xwe dest bi şoreşê kir. Em dest bi şoreşê kir da ku azad bijîn û rêça şehîdên xwe bidomînin.”
Piştî axaftinan hunermend Waîl Çaçû, Koma Elenya, Koma Serhildan û Koma Delîla ya ji bajarê Amûdê stran gotin.
DÊRIK
Li Parka Şehîd Dîcle ya bajarê Dêrikê jî şahiya salvegera Şoreşa 19‘ê Tîrmehê hat lidarxistin. Piştî deqeya rêzgirtin nûnera Kongreya Neteweyî ya Kurdistanê (KNK)- Rojava Fatima Elî Lekto axivî. Fatima salvegera Şoreşa 19‘ê Tîrmehê pîroz kir û banga parastina destkeftiyên şoreşê kir.
Piştre Koma Cûdî û Koma Jinan a Ji Amûdê stran pêşkêş kirin. Girese li ber stranan govend gerandin.
QAMIŞLO
Bi beşdariya girseyek mezin a şêniyan û şervanên YPJ û YPG‘ê şahiyek li Parka Azadî ya bajarê Qamişloyê hat lidarxistin. Beşdaran posterên Rêber Apo, wêneyên şehîdên şoreşê û alên YPG û YPJ‘ê hildan.
Şahî bi deqeyeke rêzgirtin dest pê kir. Piştre endama Desteya Hevserokatiya PYD‘ê Foza Yûsif salvegera şoreşê pîroz kir û bi bîr xist ku şoreş bi armanca mîsogerkirina mafên gelê Kurd û jiyana hevbeş di navbera tevahî pêkhateyên herêmê ji bajarê Kobanê dest pê kir.
Foza Yûsif diyar kir ku şoreş derbasî qonaxeke nû an ku mîsogerkirina maf û destkeftiyan di destûra Sûriyeyê de bûye.
Piştî axaftina Foza Yûsif, hunermend Comerd, Deniz Deman û Koma Stêra Zêrîn stran pêşkêş kirin. Koma Şehîdên Qereçoxê jî hunerên xwe yên foklorîk nîşan da.
Beşdaran li ber stranan xelekên govendê gerandin û dirûşme berz kirin.
HESEKÊ
Bi sedan şêniyên bajarê Hesekê û gundewarên wê salvegera Şoreşa 19‘ê Tîrmehê li Parka 4‘ê Nîsanê pîroz kir.
Şahî bi deqeyeke rêzgirtin ji bo bîranîna şehîdan destpê kir. Piştre hevseroka Daîreya Têkiliyên Derve ya Rêveberiya Xweser Îlham Ehmed axivî.
Îlham Ehmed bi bîr xist ku di demekê de ku Sûriyeyê di nava şer de bû, Şoreşa Rojava wekî şoreşa aştiyê ji bo belavkirina nirxên azadî, edalet û jiyana hevbeş ji Kobanê dest pê kir û li bajarên din ên Rojava belav bû.
Îlham Ehmed bal kişand ser rola jinan di şoreşê de û got, Şoreşa ku jin pêşengtiya wê dikin guhertinên siyasî û civakî yên girîng pêş xistin û mafên jinan û nasnameya Kurdî da diyarkirin, naskirina Cejna Newrozê li Sûriyeyê yek ji berhemên şoreşê ye.
Her wiha anî ziman ku Şoreşa 19‘ê Tîrmehê doza Kurdî li ser asta Sûriyeyê û navneteweyî kir rojev.
Îlham Ehmed di dewama axaftina xwe de got, merheleya bê tesbîtkkirina mafên hemû pêkhateyan di serî de gelê Kurd di destûreke adilane de hewce dike.
Ji bo avakirina Sûriyeyeke demokratîk a adilane ya bi pêşengiya jin û ciwanan banga domandina têkoşînê kir û got, pêkanîna aştî û demokrasiyê li herêmê bi çareserkirina pirsgirêkak Kurd û xurtkirina rêya aştî û civaka demokratîk pêkan e.
Piştî axaftinan Koma Gerastêrk, Koma Tolhildan, hunermend Geşbîn û Hoza Comerd stran gotin. Girse li ber stranan govend gerandin.
