Di raporê de herî kêm 112 bûyerên nîjadperest, cihêkar yan jî tune hesibandinê yên ku di çapemeniya neteweyî û herêmî de hatine weşandin, hatin tespîtkirin.
Li gorî raporê, her çendî sala 2025’an gotinên “aştî”, “normalbûn” û “lihevkirina civakî” car din hatibin rojevê jî, kiryarên cihêkar ên li dijî Kurdan, koçberan û Elewiyan dom kirin û belav bûn.
Hat diyarkirin ku binpêkirinên li dijî nasnameya Kurd û Kurdî zêde bûn.
Qursên Kurdî hatin girtin, ji ber stran û dirûşmeyên Kurdî cezayên hepsê hatin dayîn û binçavkirin çêbûn, weşanên Kurdî hatin astengkirin û li qada civakî Kurdî rastî cihêkariyê hat, evane hemû di nava van binpêkirinan de bûn. Her wiha taloqkirina berdana girtiyên nexweş û cezayên disiplînê yên ji ber Kurdî, di raporê de derketin pêş.
Hat destnîşankirin ku binpêkirinên li dijî mafên koçberan jî pêk hatin. Her wiha hat ragihandin ku binpêkirinên li dijî Elewiyan di çarçoveya azadiya bawerî û gotina nefretê de, zêde bûne.
Li gorî raporê sala 2025’an li dijî Kurdan 89, li dijî koçberan 17 û li dijî Elewiyan 6 bûyerên nîjadperest yan jî cihêkar hatin tespîtkirin.
SAMER destnîşan kir ku tespîtên di çapemeniyê de tenê yên hatine dîtin in, dibe ku rewşa rast hîn girantir be.
