Tevî hemû polîtîkayên helandin û çewisandinê yên hêzên hegemonîk û dagirker, di dîrokê de her tim karîne çanda xwe biparêzin û ev yek gihandine nifşên nû. Şanogera ji bajarê Kerkûkê ya Başûrê Kurdistanê Azîn Hesen, ji ajansa me re têkildarî çanda Kurdewarî, pêşxistina wê û hatina xwe ya cara yekemîn li Bakur û Rojhilatê Sûriyeyê, axivî.
‘ROJAVA DI WARÊ ŞANOYÊ DE JI KERKÛKÊ PÊŞKETÎTIR E’
Azîn Hesen diyar kir ku ew cara yekemîne tê Rojavayê Kurdistanê û şêwazê çand û hunera vir dibîne û wiha dest bi axaftina xwe kir: “Li Rojava hunerekî dewlemend heye. Li vir azadiya jinê heye. Jin dikare bi awayekî azad kar bike û di nav karê çandê de cihê xwe bigre. Lê belê li Kerkûkê ev yek kêm e û jin ne gihiştiye asta ku bikaribe bi rehetî di nav kar û xebatên civakê de cihê xwe bigre. Her tim bi hêvî me ku gel bi riya şanoyê zêdetir pêş bikevin. Rojava xwedî çandekî pir hêja ye. Kurdayetiyek pir mezin nîşan dide. Mixabin Kerkûk li gorî Rojava di warê şanoyê de hinekî kêmtir e. Ew jî ji ber zextên heyî ye. Lê belê em hewl didin ku ciwanan di warê şanoyê de zêdetir pêş bixin. Pêwîste ev derfeta hunerî ya ku tê dayîn, ji bo her kesî bi awayek rast were bikaranîn.”
‘ÇIQAS HUNERA ME LI PÊŞ BE EM EWQAS XWE NAS DIKIN’
Azîn Hesen di berdewamiya axaftina xwe de got ku heya Kurd bi giştî nebin yek, wê ti carî pêşketin di civaka Kurd de çênebe û wiha bilêv kir: “Pêwîstiya me heye ku hîn bêhtir Kurdbûna xwe nas bikin û zindî bihêlin. Ev yek jî bi riya hunerê bi taybetî şano re em dikarin bikin. Çiqas hunera me li pêş be ewqas em xwe nas dikin. Pêwîste em Kurd bibin xwedî yek armanc da ku kes nikaribe me veqetîne. Dema em dibêjin Kurdên Başûr, Rojava, Bakur û Rojhilat nayê wê wateya ku em ji hev qut in. Em hemû Kurdên Kurdistana yekparçe ne. Em ê piştgirî bidin hevdû û asta hunera xwe ya Kurdistanê mezin bikin.”
‘GAVA SEREKE YA HUNERÊ AZADIYA JINE’
Azîn Hesen li ser gavên destpêkê yên ji bo pêşketina şanoyê wiha dibêje: “Divê di şanogeriyê de jin azad û serbixwe be. Ez bixwe herî zêde balê dikişînim li ser mijarên jin. Ji ber ku di dîrokê de jin rastî zext û tundiyê hatiye. Lewra jin dikare hestan rast bîne ser ziman. Di riya hunera şano de em dikarin pergala zilama serdest ji holê rakin. Di Kerkûkê de em pir dixwazin xebatên bi vî rengî lidar bixin da ku ev hişmendiya zayendperest bi temamî tune bibe.
Bi rastî hatina me ya Rojava ji bo me kêfxweşiyek bû. Em gelek spas dikin û hêvî dikin ev serdan nebe serdana dawî. Ji bo me bibe serdana yekem û gelek carên din em tevlî kar û xebatên hunerî yên Rojava bibin.”
