Şehîdên Azadiyê yên Kurdistanê Bêrîtan Amed û Çiya Rizgar li gorî wesiyeta xwe li Şehîdgeha Qendîlê bi merasîmekê hatin veşartin. Endama PAJK’ê Bêrîtan Amed (Semra Duva) ku 33 salan bê navber di meşa şoreşê de meşiya 27’ê Tebaxê, endamê Komalên Ciwan Çiya Rizgar (Arjen Yavûz) ê ku sala 2013’an de tevlî nava refên gerîla bû jî 25’ê Tebaxê ji ber nexweşiya kanserê şehîd bûn.
Di merasîma cenaze de ya li Şehîdgeha Qendîlê aktîvîsta siyasî Ronahî Huseyîn axivî. Ronahî Huseyîn got, “Xewn û xeyala Şehîd Bêrîtan ew bû ku nexweşiyê têk bibe û li nava hevalên xwe yên têkoşînê vegere. Wesiyeta wê jî ew bû ku eger şehîd bikeve li gel hevalên xwe yên têkoşînê bê veşartin. Lê belê nexweşiya wê giran bû û tevlî nava şehîdên azadiyê yên gelê Kurd bû.
Em xwe weke şopdarê rêya şehîdan dibînin û dibêjin, em ê li ser rêya wan a têkoşîna azadiyê bimeşin. Em ê heta dawiyê deyndarê ked û xwîna şehîdên xwe bin. Ew xwediyê rasteqîn ê vî welatî ne. Em ê jî destketî û mîrateya şehîên xwe biparêzin.”
Endamê Komîteya Qendîlê ya Malbatên Şehîdan a Tevgera Azadiyê Hemed Emîn Xidir jî got, “Spasiya her kesî dikim ên ku beşdarî vê merasîma ji bo şehîdên me bûne. Tevlîbûna şêniyan li merasîmên ji bo şehîdan dilsoziya bi xewn û xeyalên azadiyê yên şehîdan re ye.”
Piştî axaftinan nasnameya şehîdan hate xwendin. Piştre jî cenazeyên Şehîd Bêrîtan Amed û Şehîd Çiya Rizgar li ber dirûşmên ‘Şehîd namirin’ û ‘Bijî Serok Apo’ li Şehîdgeha Qendîlê hatin veşartin.
