Şervanê Hêzên Erka Xweparastinê Ramiz Mihemed Bîlal 9’ê Cotmehê dema erka xwe bi cih dianî li Dêrikê şehîd bûbû, îro bi merasîmê hat oxirkirin. Bi sedan şêniyên bajarên Girkê Legê, Dêrik û Çilaxa cenazeyê şehîd Ramiz ji pêşiya Nexweşxaneya Nîştimanî ya Dêrik wergirt û bi karwanekî ber bi Pakrewangeha Şehîd Xebat a Dêrikê ve oxir kir.
Li pakrewangehê piştî deqeyek rêzgirtin, endama Meclisa Malbatên Şehîdan Sureya Hebeş axivî û got, “Şehîd sembola aştiyê ne. Divê em xwedî li ked û fedakariyên ku dane derkevin.”
Sureya Hebeş anî ziman ku bi saya fikr û felsefeya Reber Abdullah Ocalan gelên herêmê bûn yek û bi hezaran keç û xortên pêkhateyên herêmê projeya neteweya demokratîk diparêzin da ku jiyaneke azad û bi rûmet ji tevahî gelan re mîsoger bikin.
Ji rêveberên Hêzên Erka Xweparastinê Ehmed Xerzî jî axivî û got: “Em hêzên leşkerî soza xwe li pêşberî şehîdan nû dikin ku em ê bi xwîna xwe erdê xwe biparêzin. Divê tevahî pêkhateyên herêmê li êriş û xetereyan bibin yek.”
Piştre nasnameya şehîd Ramiz Bîlal hat xwendin û radestî malbata wî hat kirin.
Cenazeyê şehîd bi dirûşman spartê axê.
