Komîteya Dîplomasiyê ya Tevgera Azadiyê ya Jinên Êzidî (TAJÊ) bi rasthatina 8’ê Adarê re Roja Jinên Cîhanê serdana partiya Goran, Partiya Şûîî û partiya Zehmetkêşan kir. Hevdîtin bi jinên ji partiyan re hate kirin û di serî de 8’ê Adarê li jinan hate pîroz kirin.
Hevdîtin li bajarê Silêmaniyê pêk hatin. Partiyan bi germahî pêşwazî li şandeya Komîteya Dîplomasiyê ya TAJÊ kirin.
Piştre nîqaş li ser guhertina Qanûna Rewşa Kesî û Efûya Giştî tevî xeteriyên van zagonan hatin meşandin.
Di hevdîtinan de xeteriya guhertina Qanûna Rewşa Kesî û Efûya Giştî hate nîqaş kirin û hate diyar kirin ku guhertina Qanûna Rewşa Kesî Iraqê ber bi paşveçûnekê û xeteriyekê mezin ve dibe. Ev guherîn rê li ber kuştina zarok û jina vedike. Guhertina vê qanûnê ji aliyê zihniyeta mêrê serdest ve hatiye kirin. Di nîqaşan de bal hate kişandin ser wê ku divê hemû jin bi yek dengî guhertina qanûnê red bikin. Di heman demê de diyar kirin ku ji bo pêşiya kuştin û qirkirina jin bê girtin divê yekîtiya jinan bihêz bibe.
Şandeyê tevî partiyan li ser Efûya Giştî jî nîqaş kirin û diyar kirin ku ji bo ev efû neyê erê kirin divê civaka Iraqê bêdeng nemîne. Ev efû xeteriyên mezin ji bo Iraq û bi taybet ji bo civaka Êzidî û jina Êzîdî tîne. Fikar hene ku efûya giştî rê veke ku çeteyên DAÎŞ’ê jinûve xwe zindî bikin. Jinên Êzidî êşên mezin û nayên jibîrkirin û dermankirin ji destê çeteyên DAÎŞ’ê kişandin.
