Jinên Kurd û jinên ji gelek welatên cîhanê her sal bi hêrseke mezin hesabê komkujiya Parîsê dipirsin û nerazîbûna xwe tînin ziman. Li çiyayên Kurdistanê jî gerîlayên YJA Starê xwedî li nirxên jin a azad derdikevin. Gerîlayên YJA Starê Gelawêj Teyrê Baz û Delîla Çinar bi wesîleya salvegera komkujiya Parîsê têkildarî ji pêşengên tevgera azadiyê şehîd Sara axivîn.
Gelawêj Teyrê Baz anî ziman ku ew ji sekna şehîd Sara bi bandor bû û ji bo bersivê bide komkujiya Parîsê beşdarî nava tevgera azadiyê bû û got, “Şehadeta hevrê Sara, Rojbîn û Ronahî bandoreke mezin li me kiribû. Careke din şexsê wan de şehîdên şoreşê hemûyan bi bîr tînin û bejna xwe bi hurmet li ber bîranîna wan ditewînin. Min navê hevala Sara ji ber berxwedana wê ya li zindana Amedê bihîstibû. Di nava gel de têkoşîn û berxwedana wê timî dihate vegotin. Şehadeta hevala Sara di medyayê de gelekî cih girtibû, gelekî bandor li min kiribû û hêrsa min a tolhildanê mezin kir. Li ser vê bingehê di sala 2013’an de min biryar da ku tevlî bibim û beşdarî nava refên tevgera azadiyê ya Kurdistanê bûm.”
‘EZ Ê HER TIM LI SER XETA BERXWEDANÊ YA HEVALA SARA BIMEŞIM’
Gerîla Gelawêj Teyrê Baz got, “Mirov dema ku hevala Sara nas dikin, dibînin bê di nava rêxistinê de kedeke çawa da, bi taybetî jî ji bo azadiya jinan, ji bo tevlî nava tevgerê bibe kete nava hewldaneke çawa” û axaftina xwe bi vî rengî dewam kir: “Ji ber vê jî sekna hevala Sara ji bo me xet e. Bi berxwedana xwe ya li zindanê bingeha mayina li ser piyan a vê tevgerê ava kir. Sekna wê ya îdeolojîk hêviyeke mezin da me hemûyan; em jî xwe li ser vê bingehê bi rêxistin dikin. Hevala Sara ji her alî ve hevrêyeke me ya mînak e, carna dibêjim, xwezî şensê min hebûya ku pê re bimam. Wêneyek an jî dîmenekî bi tenê yê wê têrê dike ku hesta azadiyê bi mirovan re peyda bibe. Ji ber vê jî ez ê her tim li ser xeta berxwedanê ya hevala Sara bimeşim.
Bi taybetî divê jin xwedî li nirxên şehîdên me derkevin. Di vê pêvajoyê de Rêber Apo bi banga Aştî û Civaka Demokratîk re gaveke girîng û dîrokî avêt. Ji bo ev pêvajo bi rengekî rast û xurt bê meşandin û em karibin xwedî li xeta berxwedanê ya şehîdên xwe derkevin em ê têbikoşin. Tênê bi vî rengî dikarin bibin hevrêyên rasteqîn ên Rêberê xwe. Rêber Apo rola jinan bi şênberî destnîşan kir. Di hevdîtinan hemûyan û nirxandinên xwe de rola ku dide jinan bi şênberî tê dîtin. Pêkhatina azadiya jinê yek ji armancên me yên bingehîn e.
Lewma divê em ji her kesî bêhtir vê têkoşînê bimeşînin. Divê em ji her kesî bêhtir xwedî li Rêbertî derkevin, êşa gelê me ji her kesî bêhtir hîs bikin û her êrişa li hemberî jinan veguherînin hêrsa tolhildanê. Hevala Sara nirxê manewî yê jinan hemûyan e. Keseke bi tenê bû lê belê cihê xwe di dilê her kesî de girt. Hevala Sara ruhekî mezin afirand, her kes xwe li ser vê bingehê bi rêxistin dike. Em ê jî xwe li ser vê xetê bi rêxistin bikin, xwedî li hevrêyên xwe yên şehîd derkevin û xeta wan biparêzin.”
‘HEVALA SARA BI SEKNA XWE YA KU SERÎ NATEWÎNE TÊ NASKIRIN’
Gerîlaya YJA Starê Delîla Çinar di şexsê şehîdên Parîsê bi bîranîna şehîdên Kurdistanê hemûyan dest bi axaftina xwe kir, anî ziman ku ew hêza xwe ji fermandarên weke Sara werdigirin û got, “Dema ku tevlî nava refên tevgera azadiyê bûm, gotina ‘Jiyana min timî şer bû’ timî dihate bilêvkirin. Bi rastî jî vê gotinê bala min kişandibû. Dema ku hîn bûm ku ev gotin navê pirtûka hevala Sara ye, min xwest pirtûkê bixwînim. Dema min pirtûk xwend, min baştir fêhm kir bê sekna hevala Sara ya li dijî mejiyê desthilatdariyê çiqasî xurt e. Li hemberî mejiyê zayendîperest û paşverû yê ku jinê dike kole, her tim di nava lêgerîn û têkoşînê de bû. Hevrê Sara bi sekna xwe ya serî natewîne û kesayetiya xwe ya şoreger dihate naskirin.
Sekna wê ya li zindanê bandor li her kesî kir. Li gel êşkenceyên giran jî serê xwe netewand, her tim li ber xwe da. Bi berxwedana xwe weke çiyayekî bû; ji bo xwegihandina azadiyê gelekî berdêlên mezin da. Hevala Sara salên dûr û dirêj li qada Rêbertî ma û Rêber Apo jî qîmeteke mezin da hevrê Sara. Wezîfeya me jî ew e ku weke hevala Sara bijî û li ser xeta wê israr bike. Tenê bi vî rengî em dikarin hêjayî têkoşîna wê bin. Hezkirina hevala Sara ya ji xweza û jiyana partiyê gelekî xurt bû. Her sibeh diçû sporê û ev yek bi eşqeke mezin dikir; ji ber vê jî li ser xwe bû. Em ê jî sekna şehîd Sara ji xwe re bikin esas û heta dawiyê têkoşîna wê dewam bikin. Bi taybetî em dixwazin di vê pêvajoyê de sekneke xurt nîşan bidin. Em ê bi banga Rêber Apo re vê pêvajoyê rast fêhm bikin û bi rengekî rast tevlî pêvajoyê bibin. Mîrateya berxwedanê ya hevala Sara wê bibe pîvana me ya jiyanê.”
