Ji roja destpêkê hetanî roja me ya niha min gelek çîrok û serpêhatiyên vê berxwedana dîrokî ya şervanên QSD-YPJ’ê yên li Tişrînê anîn ser ziman. Me gelek çîrok, serpêhatiyên xort û keçên xwerû û bedew yên vê axa pîroz vegotin. Lê belê çîroka vê carê gelekî bi êş e û di her henaseyeke wê de têkoşîn xwe nîşan dide.
Ez di roja 5’emîn de gihîştim eniya Tişrînê. Yek ji kesên destpêkê me li vir hev dît û naskir Şehîd Ronahî bû. Peywira Şehîd Ronahî Yekta fermandariya taburekê bû. Lê belê di pêvajoya berxwedanê de peywira ku wê wergirtibû ser milên xwe mîsoger ji vê yekê zêdetir bû. Cara ewil wê rastiya berxwedaniya hevrêyên xwe ji raya giştî re ragihand. Di rojên destpêkê de daîreya şerê taybet ya dewleta Tirk a dagirker îdîa dikir ku Bendava Tişrînê ketiye destê wan û qaşo di kontrola wan de ye. Wekî belgekirina berxwedaniya şervanên QSD-YPJ’ê me li ser wê esasê bi awayekî dîtbarî rastiya vê berxwedanê parve kir. Di wan belgeyên me de şehîd û fermandara nemir Ronahî Yekta jî cîh digirt. Endamê ragihandina azad Enes Yildiz têkildarî berxwedaniya Tişrînê bernameyek amade dikir. Min jî weke kameravan dîmen digirt. Li aliyê çepê Enes Yildiz û Şehîd Ronahî Yekta rawestiya bûn. Şehîd Ronahî Yekta, 5 rojên destpêkê yên berxwedaniyê û tevahiya êrîşên çeteyên dagirker dinirxand. Di dawiyê de soza parastina axa Bakur û Rojhilatê Sûriyeyê da. Yek ji kesên ku cara ewil rastiya berxwedaniya şervanan ji raya giştî re radigihand, fermandar Ronahî Yekta bû. Li gel vê yekê şehîda nemir Ronahî Yekta, derbeyek li daîreya şerê taybet ya dewleta Tirk a dagirker dixist û rûyê wan yê rast ji raya giştî re eşkere dikir. Wexta ku têkildarî rewşa herêmê diaxivî, sekna wê û pejndariya wê bandoreke mezin li mirovan dikir.
EW FERMANDAR, XWIŞK Û DAYIKA ŞERVANAN BÛ
Piştî ku me ew bername kişand, em çûn li ba şervanên ku di çeperan de cîh digirtin. Di nav yekîne û tabura girêdayî Şehîd Ronahî Yekta de şervanên leheng hebûn. Li wir tişteke balkêş hebû. Çeper û stargehên şervanan pir paqij û bi rêkûpêk bûn. Wekî ku qet pêvçûn li wir neqewimî be. Bi rastî jî yekser bala mirovan dikişand. Şehîd Ronahî Yekta şer û pêvçûnên berxwedaniyê koordîne dikir. Her wiha peywendiya wê ya bi şervanan re kêm nedibû. Şervaneke çavvekirî û fermandareke pejndar bû. Li gorî derfetan Şehîd Ronahî ji bo şervan û hevrêyên xwe xwarin çêdikir. Ji ewlekariya çeperan, ji têrkirina şervan û hevrêyên xwe yên di berxwedaniyê de heyanî şêwaza lêdana dijmin, Şehîd Ronahî Yekta pêşiya hêzên xwe ronî dikir. Xwe ji cebilxane, lojîstîk, koordînekirina şer, heyanî bilindkirina moral û motîvasyona şervanan berpirsiyar didît. Ew bibû fermandar, xwişk û dayika şervanên li çeperên berxwedaniya Bendava Tişrînê.
LI ENIYÊN BERXWEDANA TIŞRÎNÊ BI SEDAN RONAHÎ HENE
Di çeperên şer de û li ser bêtêla leşkerî dengê şervanan bi soza rakirina tola Şehîd Ronahî bilind dibû. Piştî agahiya şehadeta şoreşgera jin û fermandara YPJ’ê Ronahî Yekta hat, şervanan bi dirûşmeya “Şehîd namirin” soza xwe nû dikirin. Li ser vê esasê roja îro dema ku em li vê berxwedanê temaşe dikin, ew berxwedaniya ku di şexsê Ronahiyan de di 7’ê Kanûna 2024’an de dest pê kir û îro gihîştiye roja xwe ya 72’yemîn. Niha li ser şopa Ronahiyan bi sedan keç û xortên axa pîroz berê xwe didin çeper û eniyên şerê berxwedanê. Ango di nava vî şerê berxwedanê de niha bi sedan Ronahî cîh digirin.
