Bi hezaran jin li ser banga Platforma Jinan a Stenbolê di çarçoveya 25’ê Mijdarê Têkoşîna li Dijî Tundiya li Ser Jinan a Navneteweyî li Tunela Taksîmê kom bûn. Jinan bi dirûşmeya “We got malbat exlaq, we qetil kir! Jin li dijî tundiya dewleta mêran serî hildidin” hate organîzekirin, tevî ku hemû rêyên ku diçin Îstîklal û Taksîmê hatibûn girtin jî meşiyan.
Jinan di meşê de dirûşmeyên “Jin jiyan azadî”, “Bila tundiya dewleta mêran bi dawî bibe” û “Bijî hevgirtina jinan” berz kirin. Di meşê de pankart û dovîzên “Dem dema vejîna jinên ciwan e”, “Çi hat serê Rojîn?”, “Em ê ji bo jinên karker ên ku we li Dîlovasiyê qetil kirin, li dijî sîstema we şer bikin”, “Li dijî sermaye û baviksalarî serhildanê mezin bikin”, “Jinên azad ên ku ji Rojava heta Filistînê li ber xwe didin wê bi ser bikevin”, “Em dev ji Rojîn bernadin”, “Bijî şoreşa jinan” û “Têkoşîna jinan manîfestoya jiyanek azad e” hilgirtin.
BARÎKATA POLÎSAN DERBAS KIRIN
Tevî hewldanên polîsan ên astengkirinê jî jinan barîkat rakirin û ber bi kolana Îstîklal ve meşiyan. Piştî meşê daxuyaniya çapemeniyê hate xwendin. Daxuyani bi Tirkî ji hêla Melike Tahmaz û Çîgdem Atay û ya Kurdî jî ji hêla Hanim Rojbîn Ozmen ve hat xwendin.
Hanim Rojbîn Ozmen diyar kir ku jin bi biryar in ku pergala serdestiya mêran biguherînin û got: Em ê ji bo jiyana xwe, azadiya xwe û wekheviya xwe li dijî tundiya dewleta mêran têkoşîna xwe bidomînin.”
