Serokê DYA’yê Donald Trump, piştî girtina Serokê Dewleta Venezuelayê Nicolas Maduro ji aliyê hêzên DYA’yê ve, di hevpeyvînekê de ligel Fox Newsê derbarê guhertina siyasî ya li wî welatî daxuyani bûn. Trump, li ser pirsa gelo dê piştgiriyê bidin lîdera mûxalîf Maria Corina Machado ya ku niha li Norwêcê ye ku bibe seroka Venezuelayê yan na, wiha bersiv da: “Divê em niha lê binêrin.”
Trump bi bîr xist ku li Venezuelayê cîgirê serokek heye û hilbijartina Maduro wekî “şermezarî” pênase kir. Trump diyar kir ku girtina wî peyamek e ku “DYA êdî nayê biçûk dîtin” û angaşt kir ku DYA her sal bi sed hezaran mirovî ji ber tiryakê winda dike. Trump got: “Em ê êdî rê nedin vê yekê.”
MADURO Û HEVJÎNA WÎ BIRIN NEW YORKÊ
Trump eşkere kir ku Nicolas Maduro û hevjîna wî Cilia Flores piştî ku ji aliyê DYA’yê ve hatin girtin, birine New Yorkê. Trump diyar kir ku her du dê di çarçoveya dozên li New Yorkê de werin darizandin û veguhastina wan bi helîkopter û keştiyê tê kirin. Trump ji bo Maduro got: “Ew berpirsê mirina gelek merivan bû.”
OPERASYON LI CIHEKÎ ‘WEKÎ KELAYÊ’ HATE KIRIN
Trump hûrguliyên operasyonê jî parve kirin û da zanîn ku girtin li şûneke ku ji malê bêtir dişibe “kelayê” û bi pola hatibû xurtkirin, pêk hatiye. Trump diyar kir ku operasyon beriya çar rojan hatibû plankirin lê ji ber şert û mercên hewayê hatibû taloqkirin û got: “Hewa ji nişka ve vebû û me got ‘dest pê bikin’.”
BANGA ‘TESLÎM BIBE’ Û PEYAMA PETROLÊ
Trump angaşt kir ku hefteyek beriya êrîşê bi Maduro re axiviye û jê re gotiye “divê tu teslîm bibî.” Trump her wiha anî ziman ku DYA dê ji niha û pê ve di pîşesaziya petrolê ya Venezuelayê de “bi awayekî xurt cih bigire.”
Serokê DYA’yê diyar kir ku di dema operasyonê de ji aliyê wan ve “çend birîndar” hene lê ti windahiyên canî çênebûne. Trump got ku rewşa leşkerên birîndar baş e.
