Serokê DYE’yê Donald Trump diyar kir ku ew gelekî ji Îsraîl û Îranê ‘’razî nebû û got: ‘’Îran û Îsraîlê agirbest binpê kirin.’’
Trump nerazîbûna xwe bi van gotinan bilêv kir: ‘’Min êrîşa Îsraîlê ya piştî agirbestê baş nedît û pêşwazî nekir.’’
Trump li ser medyaya dijîtal Truth Socialê daxuyaniyek da û got: ‘’Îsraîl. Van bombeyan neavêjin. Ger hûn biavêjin ev yek wê bibe binpêkirineke pir mezin. Pîlotên xwe vegerînin! Serokê Dewletên Yekbûyî yên Emerîkayê Donald J. Trump.’’
QETER: DIVÊ AGIRBEST JI BO ÊRÎŞA LI HEMBERÎ XEZEYÊ NEYÊ BIKARANÎN
Serokwezîrê Qeterê ku di pêkhatina agirbestê de rol lîst, got ku ew hêvî dike ku Îsraîl agirbesta xwe ya li gel Îranê ji bo êrîşkirina xakên Filistînê bi kar neyne.
Şeyh Muhammed bin Abdulrahman Al-Thani got: ‘’Em hêvî dikin ku Îsraîl agirbesta xwe ya li gel Îranê ji bo êrîşkirin û bomberdûmankirina Xezeyê ya bi kêfa dilê xwe bi kar neyne.’’ Wezîrê Qeterê da zanîn ku ew ê di nava du rêjên pêş de hewl bide di navbera her du aliyan de muzakereyan pêk bîne.
LI ÎRANÊ HERÎ KÊM 610 KES MIRIN
Li gorî bîlançoya nû ya Wezareta Tenduristiyê di şerê Îran û Îsraîlê yê ku di 13’ê Hezîranê ji aliyê Îsraîlê ve hate despêkirin de, roja Sêşemê jî di nav de herî kêm 610 kesan jiyana xwe ji dest dane û zêdetirî 4,700 kes jî birîndar bûne.
Berdevkê Wezaretê Huseyin Kermanpur li ser medyaya dijîtal X’ê peyamek da û got: ‘’Di nava 12 rojên dawîn de nexweşxane bi rewşên gelekî dijwar re rû bi rû man.’’
