Yekitiya Ragihandina Azad (YRA) îro ahenga ragihandin û belavkirina Xelatên Kedê yên Şehîd Mezlûm Bagok li Navenda Çand û Hunerê ya Mihemed Şêxo ya Qamişloyê li dar xist. Nûnerên dezgehên çapemeniyê, gelek rojnamevanan, malbata rojnamevanê şehîd Mezlûm Bagok û nûnerên rêxistinên civaka sivîl beşdar bûn.
Di merasîmê de, YRA`yê xelata navneteweyî da rojnamevan Duzen Tekkal ku nivîskar, rojnamevan, derhênera belgefîlman û nûçegihana şer e û welatiyek Alman a bi eslê xwe Kurda Êzidî ye.
Li ser asta Kurdistanê, xelat ji rojnamevan Mihemed Raûf ê ji Başûrê Kurdistanê re hat dayîn. Wî di navbera 20 û 29`ê Çileya 2026`an de bersiva seferberiyê da û hat Rojava da ku êrişan û rewşa penaberan, bi taybetî li bajarên Qamişlo û Hesekê bişopîne.
Li ser asta Rojava, rojnamevan Hîba El Fatêh ku nûçegihana Ronahi TV’yê ye, ji rojnamevan Serbest Ebdo ku şahidiya qonaxa yekem a berxwedana li Efrînê kir û belge kir û rojnamevan Leyla Ebdî ya nûçegihana Ronahî TV’yê xelat wergirtin.
Di ahengê de her wiha spasname ji bo mamoste Şoreş Derwîş, rojnamevan Diyar Kurda, rojnamevan Silêman Tewîl, rojnamevan Evîn Şêxmûs, nûçegihan Sîdar Mamo, nûçegihan Suzdar Serêkaniyê, rojnamevan Berîvan Beyar, rojnamevan Nûcan Nodem, mamoste Rustem Mehmûd, Dr. Mehmûd Ebbas, mamoste Kadar Pîrê, Dr. Şivan Seîd (Rojhilatê Kurdistanê), rojnamevan Mihemed Amir, Navenda Çavdêriya Mafên Mirovan a Sûriyeyê, Komeleya Rojnamevanan a Dîcle Firatê, Sendîkaya Rojnamevanên Kurdistanê û Saziya Medyayê ya Suroyo, hatin pêşkêşkirin.
Di merasîmê de Emal Mihemed a berdevka Yekitiya Ragihandina Jinan; Ciwan Mela Îbrahîm ê serokê Daîreya Ragihandinê ya Rêveberiya Xweser, Rehman Xerîb ê nûnerê Navenda Metro li Başûrê Kurdistanê, Mariya Henna li ser navê Saziya Suroyo û Hesen Qoşo yê mamosteyê Enstîtuya Bilind a Ragihandinê axivîn.
Şehîd Mazlûm Bagok (Ehmed Saado) yekem rojnamevan bû ku dema di şerê li Rojava yê li dijî çeteyên DAIŞ`ê dişopand, şehîd bû. Ew di sala 1992`yan de li Qamişloyê ji dayik bû. Wî ji temenê xwe yê biçûk ve bi rêya hin malperan dest bi karê medyayê kir û li ser çêkirina çend belgefîlman xebitî ku yek ji wan li ser Serhildana Qamişloyê ya 12`ê Adara 2004`an bû. Paşê, ew tev li Navenda Ragihandinê ya Yekîneyên Parastina Gel (YPG) bû û gelek eniyên şer şopandin heta ku di 28`ê Îlona 2014`an de dema wek rojnamevan pêvajoya vekirina korîdoreke mirovî di navbera Rojava û Şingalê de dişopand, şehîd bû.
