Şervanên QSD’ê Mordem Korîka (Nezhan Ebdulqadir) ku 10’ê Çileyê û Mazlûm (Kadar Qerxo) ku 18’ê Çileyê şehîd bûne, bi merasîmekê hatin oxirkirin.
Bi sedan şêniyên bajarên Dêrik, Girkê Legê û Çilaxa yên kantona Cizîrê cenazeyên her du şehîdan ji Nexweşxaneya Şehîd Hogir wergirtin û ber bi Pakrewangeha Şehîd Xebat Dêrik ve bi rê ketin.
Li pakrewangehê merasîmek hat lidarxistin. Di merasîmê de piştî rêzgirtinê axaftin hatin kirin.
Bi navê Meclisa Malbatên Şehîdan Fatima Lekto axivî û got: “Em li Kurdistanê di rojên dîrokî de ne. Îro roja rûmet û hebûna gelê Kurd e. Komployeke mezin li dijî tevahî Kurdan heye. Li hemberî van komployan me berxwedan hilbijartiye. Bakur, Başûr, Rojhilat û Rojava li dijî êrişan bûne yek. Me dîroka xwe bi xwîna şehîdan nivîsandiye. Serkeftin dê ya me be.”
Hevseroka PYD’ê Perwîn Yûsif jî axivî û anî ziman ku dê ji bo parastina hebûna xwe li ber xwe bidin û got: “Dixwazin gelê Kurd ji fikarê DAIŞ’ê Ehmed El Şeri re serî bitewîne. Lê em vê yekê qebûl nakin. Em serî ji peymanên wan re natewînin. Berxwedan rêya serxistina Rojava ye.”
Perwîn Yûsif bi domdarî got: “Êdî lihevkirin û siyaset nîn in. Lê siyaseta me bûye ya rakirina çekan. Gelê Kurd li çar aliyên Kurdistanê û cîhanê ji bo Rojava di seferberiyê de ye.”
Ji fermandarên QSD’ê Seîd Koçer jî got dê Rojava biparêzin û got merheleya heyî merheleya çarenûsê ye, ji her kesî tê xwestin ku li hemberî planan bisekine û rûmeta gelê Kurd biparêze.
Piştî axaftinan nasnameyên her du şehîdan hatin xwendin û radestî malbatên wan kirin. Cenazeyên şehîdan li Pakrewangeha Şehîd Xebat spartin axê.
