Meclisa Malbatên Şehîdan a bajarê Til Temirê yê kantona Cizîrê ji bo 85 şehîdên di mehên Nîsan, Gulan, Hezîran û Tîrmehê û salên cuda de şehîd bûn, merasîma bibîranînê li dar xist.
Merasîm li hola Meclisa Malbatên Şehîdan, bi beşdariya nûnerên ji saziyên sivîl û leşkerî yên li herêmê, malbatên şehîdan û rûspiyên ji tevahî pêkhateyan hat organîzekirin.
Di axaftinên li merasîmê de dilsoziya bi wefadariya şehîdan re hat dubarekirin û hat diyarkirin ku pêwîstî bi berdewama xebatê ji bo pêkanîna armancên şehîdan ên avakirina civakeke demokratîkî heye.
Endamê Meclisa Malbatên Şehîdan Mahir El Ebdo di axaftina xwe de diyar kir ku ew kesên di oxira jiyaneke azad û ewle de şehîd bûn, bi bîr tînin û soza parastina nirx û destkeftiyên bi saya şehîdan pêk hatine dubare kir.
Ji fermandarên Meclisa Leşkerî ya Til Temirê Ferhad Emîn jî anî ziman ku li vê herêmê şehîd bingehên aramî û rûmetê ne û got: “Em soza xwe ya berdewama parastina vê xakê û pêkanîna armancên ji bo wê têkoşîn hatine dayîn, dubare dikin.”
Di dawiyê de sînevîzyonek li ser têkoşîna 85 şehîdan hat nîşandan.
