Xizmên windayan û Komeleya Mafên Mirovan (ÎHD) li Amed, Êlih û Îzmîrê çalakiyên xwe yên heftane domandin.
AMED
Xizmên Windayan û nûnerên Şaxa Komeleya Mafên Mirovan (ÎHD) ya Amedê ji bo winda bêne dîtin û kujer bêne darizandin li pêş Bîrdariya Mafê Jiyanê ya Parka Koşuyolu ya Amedê di hefteya 864an de çalakîyên xwe berdewam kirin. Di çalakiyê de nûnerên ÎHDê û Xizmên Windayan wêneyên kesên ku di salên 1990î de ji aliyê polîs û JÎTEMê ve hatinî windakirin rakirin rakirin. Xizmên windayan vê hefteyê aqubeta Osman Buluttekîn pirsîn. Serokê ÎHDê Ercan Yilmaz daxuyanî xwend. Çîroka Osman Buluttekîn ê ku di 23ê Tebaxa 1995an de li navçeya Pasûrê ya Amedê hatibû windakirin, jî aliyê endamê Şax a ÎHDa Amedê Firat Akdenîz ve hat xwend. Piştî daxuyanîyê Xizmên Windayan û nûnerên Şaxa ÎHDê a Amedê deqeyek çalakîya rûniştinê li dar xistin û piştre belav bûn.
ÊLIH
Şaxa ÎHD’ê ya Êlihê û xizmên windayan ji bo hefteya 700’emîn a çalakiya xwe hefetan li ber Abîdeya Mafên Mirovan a li Kolana Gulistanê kom bûn. Pankarta bi nivîsa “Em 700 hefte ne li vir in, em bêdeng nabin, em li edaletê digerin” hat vekirin. Gelek kes beşdarî çalakiyê bûn.
Di daxuyaniyê de ku pankartek mezin a ku kesên di binçavan de winda bûne nîşan dide hat vekirin, bi boneya hefteya 700’emîn qurnefîl li dayikan hatin belavkirin.
Nûnerê ÎHD’ê yê Herêmê Tahir Saçakli got: “Em 700 hefte ne ji bo rastiyê têdikoşin. Ev yek ji têkoşînên herî dirêj e. Em ji pêvajoya civaka demokratîk bi hêvî ne. Emdixwazin ev pêvajo ku bi salan e berdewam dike, bi ser bikeve. Bi vî rengî, em ê windahiyên ku em bi salan e li wan digerin bibînin.”
Saçakli behsa Pêvajoya Aştî û Civaka Demokratîk a ku ji hêla Rêber Apo ve hat destpêkirin kir û got: “Divê dengê xizmên windahiyan bê bihîstin da ku ev pêvajo bi ser bikeve. Ev pêvajo bi têgihîştinên sîstemîk ên kevn nayê meşandin. Ger dixwazin Kurd, Ereb, Tirk û Suryanî dixwazin li vê herêmê bi hev re bijîn, divê dev ji van rêbazên kevn berdin.”
Piştî daxuyaniyê Hevserokê Şaxa ÎHD a Êlihê Ahmet Şîray axivî. Şîray bilêv kir ku ew wekî Şaxa Êlihê ji 31’ê Çileya 2009’an vir bre bi pêşengiya xizmên indayan û dayikan çalakiya xwe li dat dixin û got ku divê winda bên dîtin û kiryar bên darizandin.
Şîray bal kişand ser aqûbeta Osman Bûlûttekînê ku di 23’yê Tebaxa 1995’an de li navçeya Pasûr a Amedê ji aliyê 4 kesên xwe wekî polîsan dan nasîn ji malê hat birin pirsî.
Piştî qurnefîl li ser wêneyên kesên winda hatin danîn, çalakî bi çalakiya rûniştinê bi dawî bû.
ÎZMÎR
Şaxa ÎHD’ê ya Îzmîrê li ber Sumerbanka Kevin a Konakê çalakiya xwe ya du hefteyan carekê bi dirûşmeya “Bila winda bên dîtin, kiryar bên darizandin” berdewam kir. Di daxuyaniyê de pankartên bi nivîsên “Winda diyar in, kiryar li ku ne?” û “Winda wijdan in, xwedî li wan derkeve” hatin vekirin.
Di çalakiya vê hefteyê de, Rêvebera ÎHD’ê Nazli Tûranê çîroka Îbrahîm Kartay ku di 15’ê Tebaxa 1994’an de li navçeya Hênê ya Amedê ji aliyê leşkeran ve hat binçavkirin û careke din xeber jê nehat girtin vegot.
Nazli Tûranê destnîşan kir ku divê ji bo heqîqetê û ji bo berprisên di dosyeya İbrahim Kartay de bên tespîtkirin divê lêpirsîneke çalak bê destpêkirin.
Piştî daxuyaniyê çalakiya rûniştinê ya 5 deqîqeyî hat lidarxistin.
