Kempeyn bo azadî rêber Ocalan (1)
Wutwêj legel Dr. Sîvan Se’îd pirofêsorî hawkar le zankoy Şanşî Normal, medresey xwêndine nêwneteweyiyekan, siyasetekanî Rojhelatî Nawerast, sebaret be kempeynî azadî berêz ‘Ebdula Ocalan. Em bernameyey Rawêj be rêgay Skyp le Çînewe kirawe û rastewxo le êwarey Cum’e 25-î September 2020 le têlêvîzyonî Stêrkewe bilaw kirawetewe.
Hesen Qazî: Bîneranî berêz bexêr bênewe bo bernameyekî dîkey Rawêj. Le Rawêjî emcare da mîwandarî dekeyn le Dr. Sîvan Se’îd ke pirofêsorî hawkare le zankoy Şanşî Normal le wilatî Çîn. Diyare berêzyan pêştirîş zor car le bernamey Rawêj da beşdarî kirdûwe. Zor zor bexêr bêy kak Dr. Sîvan Se’îd.
Dr.Sîvan Se’îd: Sipas rojtan baş.
Qazî: Şew baş, diyare lay êwe le Çîn şewêkî direnge. Lewe ra dest pê bikeyn wek berêzîşt agadarî KCK Koma Civakên Kurdistan maweyek leme pêştir kempeynêkî rageyand le jêr nawî ” Bese goşegîrî debê tewaw bibê, na bo faşîzm û êsta kat katî azadî berêz Ocalan e” û lew pêwendîye da diyare le Urûpaş 10-î mangî Oktobrî dahatû wekû rojî cîhanî bo azadî rêber Ocalan rageyandirawe. Berêzîşt têzî dukturayeket û kitêbeket sebaret be bizûtnewey rizgarîxwazîye le Bakûrî Kurdistan û lew pêwendîye da zanyarît heye. Lew kempeyney duwayîş da wa bizanim çend carêk legel çend kanalî têlêvîzyonî qiset kirdûwe pêm xoşe eger le rêgay dûrîşewe bê le pêşda lewe ra dest pêbikeyn ke boçûnit le ser ew daxuyanîye û her weha tewqîtî ew daxuyanîyey Koma Civakên Kurdistan çone fermû!
Sîvan se’îd: Silaw û rêz bo hemû bîneranî hêja û bo hemû karmendanî Stêrk TV. Hîwadarim le cem êwe hemû şitêk baş bêt û ew xebatey ke êsta ser rê kewtûwe êwe pişkî şêrtan heye têyda ke lanî kem be berçawî bîneranî le çuwar parçey Kurdistan egeyênin ke ew rewşe êsta çone û be rastî qise kirdin le ser ew bangewazîyey KCK renge be dû buwar da emin bituwanim qisey lê bikem. Yekêkyan eweye ke ew bangewaze eme yekem bangewaz nîye û duwem bangewaz nîye û exîr bangewazîş nabêt leber ewey ew kêşaney ke êsta le rojev da heye le bizûtnewey azadîxwazî Kurdistan da û ew xebatey ke berdewamî heye, ew amancaney ke êsta heye dîsan her le cêy xoy mawin û berdewamî heye bo bedîhênanyan. Eme yek, duwemîş êsta lew tewqîte da ke êsta rûy dawe girîngîyeke lewe daye ke be rastî faşîzmî dewletî Turk, we ke dewletî Iranîş ke êsta legelî da hem aheng bûwe ta radeyekî zor bo ewey ke be tewawî paymalî ew bizave azadîxwazey Kurdistan bikat ke be temaye nek le Kurdistan belkû le Rojhelatî Nawîn da corêkî tir le xeyalî siyasî û le xeyalî hizrî û exlaqî bênête pêş. Êsta dewletî Turk faşîzmekey geyiştûwete lûtkeyek ke geranewey bo nîye be hîç şêweyek ebê ew dewlete birwat, ebê ew dewlete bikewêt boye duwa henasekanî xoy edat le hemû ew narehetîyane ke kirdûyetî. Ca katêk ew zulm û sitem û faşîzmey ew berew ser dêt îdî kat katî azadî ye. Qiseyekî girîng heye delê:” Le katî tarîktirîn şew da, tarîktirîn lehze le şew da nizîkî şefeq e”. Ew kateye ke îdî şefeq dêt. Be rastî le Rojhelatî Nawîn da duway ew hemû narehetîye, le duway ew hemû wez’ey ke heye êstake le Rojhelatî Nawîn û Kurdistan wekû lankey ew şorişe cêgeyekî zor zor cîdîye bo ewey ke ême bilêyn şefeqêk berêweye ke hebêt û wişey kat katî azadîye le cêy xoy dayetî boye her kes be pêy xoy be pêy mecal û sî’etî xoy pêwîste beşdar bê lew kempeyne da û lew buwarewe bû ke minîş beşêk bûm le kempeyneke ke dûrim le Çînim belam endamî ew kempeynem û beşêk le ko kirdnewey îmzakan û hêndêk qise kirdin le ser çend têlêvîzyonêk û be beşdarî kirdin le çend kor û kobûneweyek da lêre le Çîn da û têgeyandinî ew xelkey ke zerûre pêyan bilêy kake giyan şitêk heye rebtî be rûmetî êwewe heye, azadîyek heye pêwîste xawendarêtî lê bikrê nek leber ewey kesêk le zîndan daye ke rêber û hizirvanêkî beşêkî xelkî em serzemîneye ke nawî Kurdistan e belkû bo rûmetî êweye ke eger her kesêk bîyewê xawendarî bika le azadî, le însanîyet pêwîste beşdarîyekî hebê, bêlayen bûn wekû David Graeber le zemanî şerî Kobanî da gutî be nawî her biyanûyekewe bê bêlayen bûn lew wez’e da pasaw nahênêtewe bo ewey ke rûmetî însanî xot biparêzî belkû ebê le beynî faşîzm û le beynî azadîxwazî da şitêk helbijêrî. Em kempeyne rast eweye ke le beynî azadîxwazî û le beynî ew dijberaney ke bo em azadîxwazyane hatûwete pêşewe ke faşîzme beserkêşî AKP pêwîste mirov mewqîfî xoy werbigrê û minîş mewqîfêkim wergirtûwe eweye ke beşdarim lew kempeyne û dijî ew faşîzmem egerçî ew faşîzme zor behêz bê û em kempeyne hêşta le sereta da bê û hêşta ze’îftir bê lew.
Qazî: Zor başe, êsta berêzit basî nemir David Graeberit kird, diyare duwaye dêynewe ser qisekanî David Graeber be taybetîş le pêwendî legel nexş û dewrî rêber Ocalan da David Graeber ke çend car serî Rojaway Kurdistanî da bû lew bareyewe qisey kird bû belam duwatir dêyne ser ew base. Diyare pêş kempeynekeş berêzit legel hêndêk lew şagirde Çînîyaney, ya ew xwêndkare Çînîyaney ke le pêwendî dekewin degel siyasetekanî Rojhelatî Nawerast dezanim ke sêmînar û konfiransit rêk xistûwe tenanet zor mîwanî dereweyî, pispor û akadêmîsîyenî dereweyît bo beşdarî kirdin û zanyarîdan bangihêştinî Çîn kirdûwe. Le pêwendî legel ew kempeyne taybetîye le astî akadêmîk û zanko da berêzit çit kirdûwe heta kû êsta?
Sîvan Se’îd: Belê, be rastî dû s’ûbey gewre heye êstake lêre. Yekem eweye ke be hoy koronawe hemû şitêk rûyekî tirî be xoyewe girtûwe ke şitekan ziyatir online nin gerçî le Çîn korona nemawe, êsta ême be îsrahet etuwanîn biçîne kilas û le kilas da mamostayetî bikeyn, belam îdî pêwendîyekan hêşta bew şêweyey lê nehatûwetewe ke hemû şitêk wekû par em kataney lê hatbêt. Ewe tozêk s’ûbeyeke û s’ûbeyekî gewretir lewe eweye ke şiklîyet û zêhnîyetî akadêmîyay Çînî, mucteme’î Çînî zêhnîyetêkî zor ciyawaztire lewey ke ême xulqman pêwe girtûwe le Rojhelatî Nawîn, le Kurdistan yan le Urûpayş. Ye’nî ferqekey beynî Kurdistan û Rojhelatî Nawîn yan Kurdistan û Urûpa keme belam lêre ferqî em beşey dinya legel beşekanî tirî dinya be rastî ewende zore ke zor car heye ebê însan ew kodane lêre têbga înca bizanê çon berxurd bika. Lewey ke min kesêkim xom be Kurd dezanim û xom be azadîxwazêk dezanim ke emewê ew dozey ke le mêşkim da heye bigate hemû kesêk be pêy tuwana, belam ewey ke şitêkî fermîyet ke nawî dewlete emin nîme û le piştmewe nîye êsta lêre. Ne ser be dewletî Turkyam ta sefaretim hebê, ne ser be dewletî Iran û Iraq û Sûryam ta sefaretyan hebê û beşêk bin lewe. Ewe s’ûbeyekî gewreye bo ewey ke akadêmyay Çînî têbgeyênî ke em şite wehaye leber ewe ebê bîxeyte naw buwarêkî tirewe ke ême pêy elêyn Area study, yan pêy elêyn siyasetî international , IR International relations, lew buwarane da ême debê qise bikeyn le ser ewey ke lêre da aktirêkî zor girîng heye ke pêy degutrê Kurd.
Dirêjey heye…
