Fermandariya Biryargeha Navendî ya YJA Starê duh bi daxuyaniyekî şahadeta yek ji fermandarên YJA Starê Medya Egîd eşkere kir ku 19’ê Mijdara 2019’an li Herêmên Parastinê yên Medyayê şehîd bibû. Şehîd Medya Egîd di şerê dijî DAÎŞ’ê de li Kerkûk û di pêvajoyên piştre de jî li Şengalê fermandariyê ji hêzên gerîla û şervanan re kir.
Merasîm ji aliyê Saziya Malbatên Şehîdan a Şengalê ve li şehîdgeha Şehîd Dilgeş û Berxwedan a çiyayê Kurdistanê hate lidarxistin.
Merasîm bi deqeyek rêzgirtin ji hemû şehîdên têkoşîna azadiya Kurdistanê û Şengalê re destpê kir û piştre jî çira hatin pêxistin. Piştî wê jî li ser navê Saziya Malbatên Şehîdan Peyman Şengalî axivî.
Peyman Şengalî sersaxî ji malbata şehîd Medya Egîd û hemû gelê Kurd re xwest û got: “Di dema fermanê de gelek hevalên giranbûha berê xwe dan axa me ya pîroz. Beşek ji van hevalan şehîd bûne û beşek jî hîn jiyan dikin. Ev heval kedeke mezin ji bo rêxistinkirina civaka me dane. Bi saya keda hevalên weke hevala Medya gelê me vedigerin ser axa xwe. Hemû kesên li ber axa me de ked dane û şehîd bûne, şehîdên me ne, em ê li ser xeta wan bin.”
Li ser navê Fermandariya YJŞ’ê jî Axîn Întîqam axivî. Axîn Întîqam destpêkê şehîd Medya Egîd bibîr anî û wiha axivî: “Şehîd Medya yek ji wan fermandaran bû ku di têkoşîna tinekirina DAÎŞ’ê de kedeke mezin da û li her devera welat ji bo parastina gel di çeperên herî pêş de cih girt. Şehîd Medya bi ruhê Apoyî ji Kerkûk heya Mexmûr û Şengalê li dijî hovîtiya DAÎŞ’ê sekinî û heya kêliya jiyana xwe ya dawiyê erk û berpirsyariyên xwe bicîh anî. Her wiha di avakirina YBŞ û YJŞ’ê de jî bû xwedî roleke mezin.”
Axîn Întîqam da zanîn şahadet giran jî be, wê ruhê têkoşîn û serkeftinê di wan de ava kiriye û wiha pêde çû: “Wek jinên Êzidî em ê timî xwedî li mîrateya ku ji me re hiştiye derbikevin. Keda ku li Şengalê daye, em ê bigihînin lûtkeyê.”
Li ser sernavê Tevgera Azdiya jinên Êzidî (TAJÊ) Dayê Şemê Remo jî şehîd Medya birêzdarî bibîr anî û got: “Her kesek ji bo rêxistinkirina civaka me ked da be em ê ji bîr nekin. Erka me jî ewe em xwedî li rêveberiya xweser derbikevin. Ji ber mîsogerkirina Rêveberiya Xweser xeyalên hemû hevalên me yên şehîd bû.”
Piştî axaftinan li ser jiyan û tekoşîna Şehîd Medya Egîd sînevîzyonek hate nîşandan û merasîm jî bi dirûşmeya, ‘Şehîd Namirin’ bi dawî bû.
