Dîwana Hevserokatiyê ya KONGRA GEL bi wesîleya sala nû daxuyaniyek weşand. Di daxuyaniyê de hate gotin, “Em sala nû di destpêkê de li Rêber Apo, li hevalên xwe yên li çiyê, zindanan û qadên din têdikoşin, li gelê xwe yê li welêt û derveyî welêt û li dostên xwe ji dil pîroz dikin û di sala nû ya têkoşînê de serketinê ji wan re dixwazin.”
Daxuyaniyê bi vî rengî dewam kir:
“Piştî 44 mehan silav û agahiya ku me ji Rêber Apo di meha Cotmehê de wergirt, bû peyam û silava herî hêja ya sala 2024’an ku têkoşîna azadiyê, gelê me û dostên me wergirt.
Asta serketinê û îradeya çalakiya fedaî ya ku 23’ê Cotmehê li Enqereyê ji aliyê hevalên me yên fedaî Asya Alî û Rojger Hêlîn ve li hemberî navenda TUSAŞ’ê hate kirin, rejîma faşîst ji her alî ve hejand. Di şexsê hevalên Asya Alî û Rojger Hêlîn de ku fedaiyên Rêber Apo bûn, em hemû şehîdên xwe yên sala 2024’an bi hurmet û minet bi bîr tînin û soza xwe dubare dikin ku hêjayî wan bin.
‘BÛYERÊN GIRÎN QEWIMÎN, DESTKETÎ HATIN BIDESTXISTIN’
Sala 2024’an bi giştî ji aliyê têkoşîna azadiyê û gelê me ve bû saleke ji pêşketinên girîng û destketiyan. Gerîla li qada xwe bi serketinên gelekî girîng dest bi sala 2024’an kir û ev yek tevahiya salê dewam kir. Xeyal û armanca dewletê ya ku bi şerê bi teknîkê encamê werbigire hate têkbirin.
Şerê ku hikumeta AKP-MHP’ê li hemberî gelê Kurd meşand bû sedema krîzeke giran a aboriyê û hilweşîneke mezin a li qadên siyasî û civakî. Di encama vê yekê de jî di hilbijartinên şaredariyan ên îsal de desthilatdariya 22 salan a AKP’ê yekemcar bû partiya duyemîn. Lewma sala 2024’an ji her alî ve bû saleke zehmet ji hikumeta AKP-MHP’ê re.
Pêngava ‘Azadî ji Rêber Apo re, çareserî ji pirsgirêka Kurd re’ ku bi pêşengiya dostan hate meşandin di sala 2024’an de li qada navneteweyî rojev afirand û pêşketinên girîng bi xwe re anî. Weke encama vê jî Komîteya Wezîran a Konseya Ewropayê mijara ‘mafê hêviyê’ têkildarî Rêber Apo xist rojeva xwe û salek dem da Tirkiyeyê ku ya pêwîst bike.
Dewleta Tirk ku dixwaze têkoşîna azadiyê ya Kurdistanê têk bibe, plana wê ya 2014-2024’an têk çû. Hikumeta AKP-MHP ku plana xwe ya têkbirinê bi ser neket, ji bo karibe xitimandina xwe ya siyasî ya di hilbijartinan de şênber bû ji holê rake, planeke nû kir. Ji bo muxalefetê bêbandor bike û rojevê bixe destê xwe, pêwîstiya xwe bi gaveke flaş hebû. Silava Bahçelî ya ji bo DEM Partiyê û peyamên xwe yên têkildarî Rêber Apo di çarçoveya vê planê de hatin kirin. Armanca vê planê ku nêteke xwe ya çareseriyê nîne, ji bo li qada navxweyî rojevê kontrol bike, raya giştî ya Kurd bixe nava bendewariyê û sist bike, li derve jî di pêvajoya hilweşandina rejîma Esad de ji bo êrîşa li ser Rojava bû. Lê belê bi vê planê ne li hundir ne jî li Rojava armanca ku dixwest nekarî bi dest bixe.
BÛYERÊN LI SÛRIYEYÊ
Bûyera herî girîng a ku mohra xwe li sala 2024’an xist, şerê navbera Îsraîl-Hamas-Hîzbûllah-Îran û Sûriye bû ku bandor li tevahiya herêmê kir. Di encama êrîşên giran ên Îsraîlê de Îran û Hîzbûllah neçar man hêzên xwe ji Sûriyeyê vekişînin û bi vekişîna Rûsyayê re jî rejîma Baas di demeke kurt de hilweşiya. Ji ber ku hêzên Esad qet şer nekirin û bi rengê radestkirin-dewrgirtinê hikumet radest kir, vê yekê nîşan da ku derketina Beşar Esad ji Sûriyeyê di çarçoveya lihevkirina navbera hêzên mezin de bû.
Hîn nediyar e ku sîstema li Sûriyeyê wê çawa be, civaka Sûriyeyê ya ji gelek nasnameyên cuda pêk tê wê bi çi rengî bi hev re bijîn. Lê belê sîstema civaka demokratîk a pirrengî ya xwe dispêre azadiya jinê ku şoreşa Rojava afirand, ji bo gel û baweriyên Sûriyeyê yên pirnasnameyî rê nîşan dide. Çareseriyeke li Sûriyeyê ya li ser bingeha neteweya demokratîk a xwe dispêre yekîtiya demokratîk a gel û baweriyan, wê ji bo çareseriya pirsgirêkên bi heman rengî yên li Rojhilata Navîn bibe mînak.
Bêguman li pêşiya çareseriyeke bi vî rengî astengiya herî mezin rejîma dewleta Tirk a faşîst e. Bi rêya rêveberiya nû ya li Şamê ji bo karibe dijminatiyê li Kurdan bike çi jê tê dike. Lê belê rastiya ku divê were zanîn ew e; sîstema Rêveberiya Xweser a Bakur û Rojhilatê Sûriyeyê hem ji bo Sûriyeyê hem jî ji bo tevahiya herêmê destektiya herî mezin e ku rêya demokrasî û aştiyê nîşan dide.
‘PARASTINA ROJAVA WEZÎFEYA BINGEHÎN A ME HEMÛYAN E’
Ji ber vê yekê li hemberî gefên giran ên rayedarên dewleta Tirk ên li ser Rojava, ji gelek welatên cîhanê û raya giştî helwesta ji bo piştevaniya Rojava hate nîşandan.
Şoreşa Rojava destketiya hevpar a gelê Kurd û dostên wan e. Şoreşa Rojava sîstemeke civakî ya demokratîk e ku hilweşîna sîstema netewe dewletê ya faşîst a tekperest radixe pêş çavan.
Ji ber vê yekê li hemberî êrîşên dewleta Tirk ên li ser şoreşa Rojava ku zêde dibin, parastina Rojava di sala 2025’an de wezîfeya herî bingehîn a gelê Kurd û dostên me yên li her devera cîhanê.
Ji ber vê eykê ji bo parastin û mayindekirina şoreşa Rojava têkoşîna ku em ê di sala 2025’an de bimeşînin, di heman demê de wê bibe serketina pêngava ‘Azadî ji Rêber Apo re, çareserî ji pirsgirêka Kurd re’.
Li ser vê bingehê em sala nû careke din li dostên xwe û gelên xwe ji dil pîroz dikin, li ser bingeha armanca serketinê di sala 2025’an a têkoşînê de serketinê dixwazin û dibêjin, sala 2025’an wê bi azadiyê tacîdar bibe.”
