Navenda Ragihandinê ya QSD’ê têkildarî operasyona li bajarê Mergeda yê başûrê Hesekê ya li dijî şaneyeke çeteyên DAÎŞ’ê daxuyanî da.
QSD’ê ragihand ku çalakî bi piştgiriya Hêzên Koalîsyona Navneteweyî piştî komkirina agahiyên têkildarî tevgerên şaneyan û cihê xwe tê de vedişart, hat kirin û wiha hat gotin: “Hêzên me bi ser cihê şaneyê de girt û cih dorpêç kir. Terorîstên şaneyê gule li hêzên me reşandin. Hêzên me jî neçar man bersiva gulebaranê bidin û şer derket. Di encama şer de terorîstek hat kuştin û yekî din ku mayin li xwe pêçandibû, xwe teqand. Çalakî bi serketî encam da û tu zerar li nêzên me nebû. Di encamê de 2 terorîst hatin kuştin û 5 terorîstên din ên endamên şaneyê hatin girtin.”
Di daxuyaniyê de hat diyarkirin ku şervanên operasyonê miqdarek çek û alavên leşkerî yên bi şaneyê re desteser kirin. Çek û alavên hatine desteserkirin ev in: 6 kalaşnîkov û 413 gule û 23 cercûrên wan, 7 bombeyên destan, 5 rext û 5 bêtêl.
