Tevgera Jinên Azad (TJA) li Êlihê bi dirûşma “Jin bi têkoşîna azadiyê aştiyê birêxistin dikin” starta çalakiyên 8’ê Adarê Roja Jinan a Cîhanê da. Daxuyanî, li pêşiya Şaxa Petrol-Îşê hate dayin û gelek kes tevlî bûn. Di daxuyaniyê de pankartên “Jin, jiyan, azadî”, “Raperîna me li dijî qirkirina jinê ye, meşa me ber bi azadiyê ve ye” hatin hilgiritn. Di daxuyaniyê de her wiha dovîzên “Azadî deynê mayiyan ê ji bo çûyiyan e”, “Azadî nayê tecrîdkirin”, “Azadî bi xwebirêvebirinê dest pê dike” û “Jin baxçeyê nepen ê azadiyê ne” hatin hilgirtin.
Jin bi cil û bergên Kurdî tevlî daxuyaniyê bûn. Di daxuyaniyê de ji ewil Hevseroka DEM Partiyê ya Êlihê Songul Korkmaz axivî û got ku jin li dijî êrişên ser destkeftiyên wan pir mezin li ber xwe didin û dê bi ser kevin.
Endama Meclisa Şaredariya Êlihê Elîf Kivircik jî anî ziman ku Rojhilata Navîn dîsa bi destê netewe dewlet û sermayedaran re ve bûye navenda Şerê Sêyemîn ê Cîhanê. Elîf Kivircik, wiha domand: “Li Bakur û Rojhilatê Sûriyeyê jî bi pêşengtiya jinan şoreşek hate kirin. Piştî hilweşîna rejîma Baasê hemû hêzên hegemon û herêmî hewl didin pergaleke li gorî berjewendiyên xwe ava bikin. Têkoşîna azadiyê ya gelan dîsa tê paşguhkirin. Li rexa din jî Rojava heye ku paradîgmaya demokratîk, ekolojîk û azadiya jinê lê bicih bûye. Rêya rizgariya ji tarîtiya modernîteya kapîtalîst ava kiriye, bêguman Rêberê Gelê Kurd birêz Abdullah Ocalan e ku bi perspektîfa neteweya demokratîk jiyaneke nû pêşkeş dike. Dê jin û Kurd qedera xwe teslîmî netewe dewletan nekin.”
Parlamentera DEM Partiyê ya Êlihê Zeynep Oduncu jî anî ziman ku jinên rastî komkujiyan tên berxwedana xwe didomînin û axaftina xwe wiha qedand: “Dema em li dîrokê dinihêrin, em girîngiya felsefeya ‘Jin, jiyan, azadî’ dibînin. Em dizanin ku ev felsefeye felsefeya rizgariya jinê ye. Jin, li her çar aliyên cîhanê li ber xwe didin. Dê ev berxwedan bidome.”
Daxuyanî, piştî gerandina govendê bi tililiyan bi dawî bû.
