Berdevka Partiya Demokrasî û Wekheviyê ya Gelan (DEM Partî) Ayşegul Dogan li navenda giştî ya partiyê civîneke çapemeniyê lidar xist û diyar kir ku ji bo hevdîtina sêyemîn a bi Rêber Apo re bê kirin serlêdan hatiye kirin.
Ayşegul Dogan wiha got: “Em li bendê ne ku di demeke herî kin de, hêj ev hefte neqediyayî ji bo hevdîtina bi birêz Ocalan re biçin Girava Îmraliyê. Em li bendê ne ku ev hevdîtin di demeke herî kin de bê kirin. Di vegerê de wê têkildarî mijarê daxuyaniyeke berfireh bê kirin. Di encama nirxandinên li wê derê de wê daxuyaniyeke berfireh bê dayin.”
Ayşegul Dogan, bal kişand ser peyama Rêber Apo bê ka wê bi dîmen be yan na û ev tişt anî ziman: “Ev mijar hêj zelal nebûye lê em hêvî dikin ku ev bangawazî bi dîmen be. Peyama bi dîmen wê ji gelek aliyan ve baştir be. Ji xwe me gelek caran got, divê tecrîd were rakirin. Daxwaza civakê jî ev e. Bandora daxuyaniyeke bi dîmen wê zêdetir be.”
