Berdevka Partiya Wekhevî û Demokrasiyê ya Gelan (DEM Partî) Ayşegul Dogan beşdarî Kongreya Asayî ya 2’yemîn a li Şirnexê bû û bal kişand ser banga dîrokî ya Rêber Apo.
Ayşegul Dogan got, “Birêz Abdullah Ocalan piştî 50 salan di bin şert û mercên tecrîda giran de bang kir. Banga wî ji bo mirovahiyê û gelên Rojhilata Navîn rûpelekî nû vekiriye.”
Ayşegul Dogan ev tişt jî bilêv kir: “Eger daxwaza aştî û civakê bi hev re nemeşe, pêkhatina aştiyê wê demek dirêj bigire. Heta niha me daxwaza aştî, civakeke azad û perwerdeya bi zimanê dayikê dikir û me digot ‘êdî bes e’. Banga Birêz Abdullah Ocalan li aliyekê destpêka aştî, li aliyê din jî destpêka civaka demokratîk e. Ji bo me rûpelekî nû vedibe. Piştî 26 salan vê heqîqetê xwe nîşan da.”
Ayşegul Dogan wêneyê ku roja 27’ê Sibatê dema bang hatî kirin hate weşandin, bi bîr xist û wiha got:
“Me di rû û çavên Birêz Abdullah Ocalan de dîrok dît. Em dibêjin êdî bes e. Em xwesteka gelê xwe dibînin û gelê me dipirse ku ‘tecrîd wê kengê rabe’, em bêdeng dimînin. Em ji vir ji Botanê bang dikin. Êdî divê şert û merc ji bo Birêz Abdullah Ocalan bên sererastkirin. Ev pêvajo divê bi pêşengiya wî pêk were. Em kêfxweş in ku Devlet Bahçelî û Erdogan însiyatîf girtine. Lê belê em qebûl nakin ku hinek di şert û mercên rehet de bixebitin û yê din jî di bin şert û mercên tecrîdê de bixebite.”
Di kongreyê de piştî axaftinan, di encama dengdanê de Taybet Bîlgî û Ramazan Ûysal ji bo Hevserokatiya DEM Partiyê ya Şirnexê hatin hilbijartin.
