Li navenda Çewlîgê îro danê sibê bi ser mala Mehmet Zekî Sayak ê 85 salî de girtin. Sayak bi hinceta ku cezayê dawî hatiye erêkirin hate binçavkirin û piştre şandin Girtîgeha Elezîzê.
Di Îlona 2012’an de li Kanîreş û gundên wê operasyon hat lidarxistin. Di operpasyonê de Mehmet Zekî Sayak ê ku di qeydên nifûsê de 76 salî ye lê li gorî malbatê 85 salî ye hatibû girtin. Sayak bi qasî sal û nîvekê di girtîgehê de ma, piştre hate berdan.
Di doza ku bi salan berdewam kir de, tevî ku der barê Sayak de delîlên şênber tine bûn jî li ser îfadeyên ‘îtirafkar’ û ‘şahidê veşartî’ îdianameyeke nû hate amadekirin. Sayak bi îdiaya “endamê rêxistinê ye” 6 sal û 3 meh cezayê girtîgehê lê hat birîn. Hat zanîn ku îfadeyên îtirafkar û şahidê veşartî digihêje sala 2012’an.
Hate diyarkirin ku nexweşiyên şekir, gurçik û movikê bi Sayak re hene û ev nexweşî pêş ketine.
Kurê wî Hîkmet Sayak diyar kir ku bavê wî 85 salî ye û rewşa wî ya tenduristiyê giran e. Hîkmet Saylak got, “Divê ev bêedaletî bi dawî bibe. Bavê min ji ber ku endamê DBP’ê bû li ser îfadeyên îtîrafkar hat girtin û î şandin girtîgehê. Divê demildest bê berdan.”
