Li Şengalê bi wesîleya 8’ê Adarê Roja Jinên Kedkar ên Cîhanê, bi tevlîbûna jin û mêran pîrozbahî hatin lidar xistin. Jin û mêrên ku beşdarî pîrozbahiyê bibûn, têkoşîna jinên kedkar û berxwedêr silav kirin.
Jina Êzidî ya bi navê Delal Revo, ewil peyama Rêber Apo ya bi wesîleya 8’ê Adarê ji bo tevahiya jinan hatiye şandin silav kir û got, “Ez di serî de 8’ê Adarê li Rêber Apo, tevahî girtiyên zindanan û li jinên berxwedêr pîroz dikim. Bi hêviya ku ev roj bibe wesîleya rizgarî û azadiya tevahiya jinan. Divê meşa me ya ber bi azadiyê ve ti carî raneweste û roj bi roj xurtir bibe. Diyariya Rêber Apo ji bo me gelek bi nirx e. Em ji Rêberê xwe re dibêjin destên te sax be. Em li vir soz didin heya azadiya Rêberê me pêk bê, ew ê têkoşîna me bidome.”
Milihim Dinayî jî diyar kir ku divê hemû roj mîna 8’ê Adarê be û got, “Em di serî de vê roja bi wate û pîroz li Rêber Apo pîroz dikin û bi hêvîne ku 8’ê Adara îsal bibe wezîleya azadiya Rêber Apo. Bila 8’ê Adarê bibe roja demokrasî û pêşîgirtina li qetilkirina ser jinan. Êdî weke her ferdek pêwîste mafê wê yê jiyanê bê dayîn, Rêber Apo hêza jinê nîşanî hemû cîhanê da. Peyama Rêber Apo ya bi wesîleya 8’ê Adarê ya ji bo tevahiya jinan, gelek bi wate û bi qîmet e. Her wiha 4 şaxên nêrgîzê jî. Divê jin bi vê moralê û kêfxweşiyê têkoşîna xwe ya ji bo azadiya Rêber Apo berfirehtir bike.”
