Bi banga 27’ê Sibatê ya Rêber Apo re pîrozbahiyên Newrozê yên îsal hîn bi girseyî pêk tên. Niha bal li ser pîrozbahiya Newrozê ya li Stenbolê ye ku wê 23’ê Adarê li qada Yenîkapiyê pêk were.
Endamên DEM Partiyê ji bo pîrozbahiya Newrozê ya li Stenbolê mal bi mal digerin û belavokan ji bo tevlîbûna li pîrozbahiyê belav dikin.
Komîteya Newrozê diyar kir ku 400 pankartên li kolanan hatine daliqandin ku 100 ji van pankartan bi Kurdî ne. Her wiha 400 reklamên bilboard jî li gelek qadên Stenbolê hatine daliqandin.
Ji bo her kes bikare bêyî pirsgirêk xwe bigihîne qada Newrozê, bi giştî 500 wesayît hatine girtin. Komîteya Newrozê ku xebatan didomîne, diyar kir ku ew li bendê ne ku îsal 1 milyon welatî li qada Newrozê kom bibin.
Şahî wê di saet 10.00’an de destpê bike û heta 18.00 dewam bike. Ji hunermendên Navenda Çandê ya Mezopotamya Kadîr Çat û Grup Praksis wê derkevin ser dikê.
AXAFTVAN
Hevberdevkê HDK’ê Alî Kenanoglu, aktîvîsta Tevgera Jinên Azad (TJA) Gultan Kişanak, Hevserokê Giştî yê Partiya Wekhevî û Demokrasiyê ya Gelan (DEM Partî) Tûncer Bakirhan, Alîkarê Hevserokatiya Giştî ya DEM Partiyê Tayîp Temel, Parlamenterê Meclîsa DEM Partiyê û endamê Şandeya Îmraliyê Sirri Sureyya Onder, Parlamentera DEM Partiyê ya Stenbolê Kezban Konukçu û Hevşaredara Êlihê Gulistan Sonuk wê di Newrozê de biaxivin.
ELEQEYA ZÊDE YA ROJNAMEVANAN
Komîteya Newrozê diyar kir ku ji bo Newrozê, îsal akredîtasyon hatiye çêkirin û destnîşan kir ku heta niha zêdeyî 100 rêxistinên çapemeniyê yên navneteweyî jî di nav de gelek rojnamevanan ji bo şopandina Newrozê, akredîtasyon çêkirine.
