1’emîn Festîvala Film a Kurdî ya li bajarê Freiburg ê Elmanyayê hatî lidarxistin, li Komunal Kino destpê kir. Festîval ji aliyê Komeleya Çandê ya Avesta ve tê lidarxistin. Ev komele bi hewldana hevpar a pêkhateyên sînemaya Kurdî ya li Freiburgê hate avakirin.
Endamên Komîteya Amadekar a Komuna Film a Freiburg Newroz Sonmez û Mustafa Ozel axaftina vekirinê ya festîvalê kirin. Piştre Hozan Axîn derket ser dikê.
Di roja ewilî ya festîvalê de, filmê drama yê bêdeng “Zare” hate temaşekirin ku sala 1926’an hatiye çêkirin, ji aliyê Hamo Behnazaryan ve hatiye nivîsîn û rêvebirin. Filmê ji aliyê Komara Sosyalîst a Sovyet a Ermenistan ve hatî çêkirin, bi performanseke muzîkal hate pêşandan.
Di çarçoveya bernameyê de her wiha kurtefilmek hate temaşekirin ku senarîstiya wê ji aliyê derhênerekî Kurd ê ji Kerkûkê û niha li Norweçê dijî ve hate kirin. Film çîroka 3 ciwanên li kampa koçberan a li bakurê Norweçê, digire nava xwe.
WÊ 16 FILM BÊN PÊŞANDAN
Festîval di navbera 2-4’ê Cotmehê de didome. Di çarçoveya festîvalê de wê giştî 16 film bên nîşandan ku ji vane 4 bi metraja dirêj in, 4 belgefilm in û 8 jî kurtefilm in.
Di roja duyem a festîvalê de bi wesîleya salvegera Komkujiya Vartînîs wê belgefilma Vartînîs were temaşekirin ku ji aliyê Mehmet Omer Bîçer ve derhêneriya wê hatiye kirin.
Di bernameya festîvalê de her wiha wê filmên Hevras, Hemo Morî, Mein Vater, der Gastarbeiter û Hevî jî bên temaşekirin.
Festîvala Film a Kurdî ku cara ewilî li Freiburgê tê lidarxistin, wê xebatên sînemagerên Kurd ên ji welatên cuda û mijarên cur be cur ên sînemaya Kurdî nîşan bide.
