Li gorî rapora Komeleya Mafên Mirovan (ÎHD) a sala 2025’an, li girtîgehên li Kurdistan û Tirkiyeyê hezar û 400 girtiyên nexweş hene. Ji vane 335 ji girtiyên nexweş pêk tên. Tevî bang û serlêdanên hatine kirin, şert û mercên tedawiyê yên girtiyên nexweş jî her diçe giran dibe.
Muayeneya nexweşan, derxistina revîrê û bidestxistina dermanan ji bo girtiyên nexweş veguheriye pêvajoyeke ku bi rojan dom dike. Bi biryarên Saziya Tiba Edlî jî şert û mercên jiyanê yên girtiyan her diçe zehmettir dibe.
Yek ji bajarên ku ev rewş piranî lê tê jiyîn jî, Wan e. Li girtîgehên li bajêr, 30 girtiyên nexweş hene. Sewq û serlêdanên tehliyeyê yên ji bo girtiyan hatine kirin, bêbersiv man û tevî raporên nexweşxaneyê yên “nikare li girtîgehê bimîne” jî tehliye pêk nayên.
Malbatên girtiyên nexweş ku Necdet Koç, Botan Karsu û Burhan Adsiz jî di nav de ne, daxwaz dikin ku derfetên tedawiyê yê xizmên wan bên pêşkêşkirin û şert û mercên wan ên tenduristiyê bên başkirin.
Hevserokê Şaxa ÎHD’ê ya Wanê Parêzer Mehmet Salîh Coşkun got, şert û mercên tenduristiyê yên li girtîgehan rewşa girtiyên nexweş hîn girantir dike. Coşkun diyar kir ku mafê tedawiyê yê girtiyên nexweş bi pêkanînên kêfî û îdarî tê astengkirin û pirsgirêkên diqewimin ji ajansa re me re vegot.
‘SEWQÊN NEXWEŞXANEYÊ CARNA QET PÊK NAYÊN’
Coşkun îfade kir ku yek ji pirsgirêkên esas ew e ku girtiyên nexweş ji bo bidestxistina mafê tedawiyê zehmetî jiyan dikin û diyar kir ku sewqên ji bo nexweşxaneyê carna pêk nayên, carna jî dereng tê xistin. Coşkun bal kişand ser ferzkirina muayeneya bi kelemçeyê jî û got, têkildarî vê yekê wan hevdîtin bi nexweşxaneyan re kiriye.
Coşkun anî ziman ku hema bêje derbarê temamiya girtiyên nexweş ên sewqî Saziya Tiba Edlî hatine kirin, biryara nerênî tê dayîn û destnîşan kir ku Saziya Tiba Edlî raporên “dikare li girtîgehê bimîne” ji bo girtiyên nexweş çêdike.
Coşkun bal kişand ser rewşa tenduristiyê ya Botan Karsu ku rewşa wî pir giran e û got, “Tedawiya wî divê li Amedê dewam bike, lê daxwazên sewqê timî tên redkirin.”
DESTPÊKÊ HATE TEHLIYEKIRIN, PIŞTRE CAR DIN HATE GIRTIN
Reşat Adsiz diyar kir ku birayê wî Burhan Adsiz ji sedî 95 astengdar e û tevî pirsgirêkên tenduristiyê yên cidî, nayê tehliyekirin û bang kir ku demildest girtiyên nexweş bên berdan.
Burhan Adsiz ê li Girtîgeha Ewlekariya Bilind a Tîpa F a Wanê tê ragirtin, nexweşê sîrozê ye û ji sedî 95 astengdar e. Sala 2015’an Adsiz hate girtin, heman salê 17’ê Kanûnê birin Desteya Tenduristiyê ya Navenda Tibê ya Dursun Odabaş a Zanîngeha Yuzuncu Yil û rapora “nikare li girtîgehê bimîne” hate dayîn.
Adsiz piştî raporê hate tehliyekirin, piştre sala 2023’yan car din hate girtin. Saziya Tiba Edlî jî destpêkê derbarê wî rapora “nikare li girtîgehê bimîne”, piştre jî rapora “dikare li girtîgehê bimîne” da.
