Tora Têkoşîna Li Dijî Tundiyê ya Amedê li dijî tundiya li ser jinan, mirinên jinan ên biguman û qetilkirinên jinan ên di demên dawiyê de ‘’Nobeta Edalet û Bîra Jinan’’ dide destpêkirin.
Jin wê 10 hefteyan rojên Sêşemê di saet 12.30’an de li pêşiya Edliyeya Amedê nobedê bigirin, çîrokên jinên hatine qetilkirin bixwînin û daxwazên xwe yên edaletê bînin ziman. Nobeda yekem wê di 6’ê Cotmehê de were girtin.
Endama Komîsyona Jinan a Amedê ya OHD’ê Parêzer Aycan Dîrîl ku di nava torê de cih digire, diyar kir ku tiştên rû dane ji cînayetên jinan derbas bûne û veguherîne komkujiyeke jinan a berê xwe daye laşê, heqîqet û hebûna jinan.
‘PRATÎKA DARAZÊ VEGUHERÎ PRATÎKEKE SERWERIYA MÊRAN’
Aycan Dîrîl têkildarî armanca nobedê û pêvajoya wê axivî û got ku komkujiyên çêbûne ji hejmarekê pêk nayên û ew armanc dikin ku li dijî vê yekê bîrekê ava bikin.
Aycan Dîrîl diyar kir ku daneyên ku ji aliyê rêxistinên jinan ve tên girtin zêdebûna qetilkirina jinan û mirinên jinan ên biguman nîşan didin û got ku nebûna daneyên fermî jî pirsgirêkeke girîng e. Aycan Dîrîl îfade kir ku mirinên jinan ên biguman ên di şeş mehên dawîn de ji hejmara qetilkirina jinan derbas bûye û ev yek anîn ziman:
‘’Mirinên biguman jî di rastiyê de dibin sedem ku lêpirsînên bibandor neyên birêvebirin û li gel van lêpirsînên bêbandor mirinên ku veguherîne polîtîkayên bêcezahiştinê zêde bibin. Divê edalet weke daxwazeke mafî derkeve pêş.’’
‘EM DIXWAZIN BÎREKÊ AVA BIKIN’
Aycan Dîrîl piştre da zanîn ku rêxistinên jinan heya roja îroyîn li gel daxuyaniyên çapemeniyê û lidarxistina meşan têkoşîn meşandine lê belê wan dît ku ev rêbaz bi tena serê xwe bi têrê nakin û ji ber vê yekê wan biryara girtina nobedê standiye û got: “Hemû hefteyan li ser nûçeyan êdî veguheriye hejmarekê, em bes dibin şahidê kurtkirina navên jinên ku hatine qetilkirin. Piraniya van weke mirinên biguman zû tên girtin. Navên jinan tên jêbirîn, dosye tên girtin û polîtîkayeke bêcezahiştinê ya mayînde tê sepandin. Em hem ji bo ku navên jinan tune nebin dixwazin bîrekê ava bikin hem jî em dixwazin daxwazên xwe yên têkildarî edaletê bînin ziman.’’
‘EM DIXWAZIN ÇÎROKÊN WAN BIDIN XUYAKIRIN’
Aycan Dîrîl di dewama axaftina xwe de got ku ew armanc dikin ku li gel Amedê hemû mirinên jinan ên li seranserê Tirkiyeyê di rojevê de bigirin û destnîşan kir ku wê nobedên werin girtin çîrokên jinan bidin xuyakirin. Aycan Dîrîl ev yek anîn ziman: ‘’Ji bo ku jin veneguherin hejmar û îstatîstîkekê me biryar da ku çalakiyeke nobedê ya ku em çîrokên wan perve bikin, bidin destpêkirin. Li gel bilindbûna têkoşîna jinan em ê li dijî veşartina wan lêpirsînan bibin asteng.’’
HEMÛ SÊŞEMAN NOBEDA LI PÊŞIYA EDLIYEYÊ
Aycan Dîrîl di dawiya axaftina xwe de bang li hemû jinan, rêxistinên maf û hiqûqê û kesên parastina jiyanê dikin, kir ku beşdarî nobedê bibin û got:
‘’Em bang li hemû rêxistinên maf û hiqûqê, jinan û hemû kesên parastina jiyanê dikin ku xwedî lê derkevin û werin ba hev. Em hemû kesan vedixwînin çalakiya nobedê ya ku em ê hemû Sêşeman saet 12.30’an de li pêşiya Edliyeyê bigirin, çîrokên jinan parve bikin û daxwazên xwe yên têkildarî edaletê bînin ziman.’’
