Qirkirina ekolojiyê û talankirina xwezayê ku demeke dirêj e li Kurdistanê dewam dike, vê dema dawiyê gelekî zêde bûye. Êrîşên li ser xwezaya Kurdistanê her roj zêde dibin, berxwedana gel a li hemberî vê yekê jî bêhtir tê dîtin.
Endama Komîsyona Ekolojiyê ya DEM Partiyê Melîs Tantan li ser mijarê ji ANF’ê re axivî û diyar kir ku êrîş û talana li Kurdistanê xwedî rabirdûyeke kevn e, ev yek weke dewama şerê taybet e.
Tantan got, “Weke dewama şerê fîzîkî û taybet, salên dûr û dirêj daristan hatin şewitandin, li geliyan bendav hatin çêkirin, bi xwezayê re hewl hate dayin ku dîrok bê tinekirin û bi polîtîkayên bêmirovhiştinê re xisareke mezin li jiyana xwezayî hate kirin.”
‘TÊKOŞÎNA AZADIYÊ YA KURD TÊKOŞÎNA JI BO PARASTINA XWEZAYÊ YE’
Melîs Tantan destnîşan kir ku têkoşîna azadiyê ya Kurd ji aliyekî ve têkoşîna ji bo parastina xwezayê ye û got, “Kurdan zanîbûn ku bi têkoşîna azadiyê re her wiha xwezaya wan jî tê parastin. Lê belê bi taybetî zêdebûna kalekolan û çêkirina bendavên ewlekariyê derb li parastina xwezayê jî hate xistin.
Ev kalekol û bendav li çiyê, li deverên herî bedew ên gundan hatin avakirin. Mînak li geliyên weke Geliyê Goderneyê, ku îro êdî tine bûne. Şertê bidawîkirina talan ekolojîk ne tenê aştî ye; her wiha aştiyeke wekhev, adîl, bi rûmet û mayinde ye. Fikara gel a li ser dewamkirina talanê ya li gel bêdengkirina çekan, fikareke mafdar û di cih de ye. Ji ber ku pêvajoyên aştiyê di heman demê de ew pêvajo ne ku bazar û razemenî zêde dibe.”
Melîs Tantan destnîşan kir ku li Kurdistanê rêya pêşîgirtina li vê yekê bilindkirin têkoşîna ekolojiyê ye, rabûna li ber talankariya serrmayeyê ye û got, “Dema ku me ev kir, wê hingî pêvajoya aştiyê mayinde û rasteqîn bibe. Yanî mebesta me ji aştiyeke bi rûmet aştiya bi xwezayê re ye.”
Melîs Tantan diyar kir ku weke DEM Partî ew ji bo zemîna têkoşîneke hevpar hewl didin û got, “Di dema nû de, di nava bagana civaka demokratîk de derfetên mezin ên vê yekê hene. Di serî de li Tirkiye û Kurdistanê piştgiriya ji hev re ya tevgerên ekolojîk, xurtkirina rêyên piştevaniyê ji bo vê demê gelekî krîtîk e. Gelan dema ku dîtin, êrîşên bi heman rengî li wan tê kirin, hingî wê hevdu bibînin, xwe nêzî hev bikin.
Di vê demê de derfet zêde ne ku yên li rojava têkoşîna ekolojiyê dimeşînin bibînin ku asta van êrîşan li Kurdistanê hîn bilind e. Lewma em ê hewl bidin aliyên dişibin hev, her wiha sedemên cuda yên polîtîkayên şer hîn bêhtir vebêjin û nîşan bidin. Ji bo vê jî di çarçoveya civînên aştî û civaka demokratîk de em ê bi têkoşerên ekolojiyê li hev kom bibin.
Li gel vî karê ji bo xurtkirina zemîna têkoşîna hevpar, em nîqaşan dikin bê civakeke demokratîk-ekolojîk û komun çawa bêne avakirin. Bi dirûşma ‘Doh zû bû, sibe gelekî dereng e, em îro di çalakiyê de ne’ li ser paşeroja xwe ya ekolojiyê em li ser rê û rêbazan diaxivin.”
Melîs Tantan diyar kir ku ev pêvajo ne pêvajoyeke bidawîbûna têkoşînê ye û got, “Divê em rastiyekê bi hev re bibînin; Mixabin êrîşên li ser xwezayê wê li Kurdistanê zêde bibin. Lê belê ev yek wê rewşeke cuda bi xwe re bîne: Bêguman ev êrîş wê bibin sedem ku têkoşîna ekolojiyê bilind bibe. Nîşaneya vê yekê ji niha ve tê dîtin: piştî demeke dirêj yekemcar çalakiyeke ekolojiyê ya bi nobet li Kurdistanê tê kirin. Li Amedê gundî li hemberî madekê dikevin nobedê.”
Melîs Tantan destnîşan kir ku êrîş li hemberî qadên jiyanê be divê berxwedana li hemberî vê yekê jî ji bo parastina qadên jiyanê be.
