Civaka Êzidî ku nav û nasnameya wê her dem bi ferman û talanan, bi koç û koçberiyê, bi jarî û belengaziyê hatiye binavkirin û naskirin îro roj hewl dide xwe ji vê hebûna ku bi mirinê hatiye pêçandin rizgar bike. Ji bo vê jî, civaka Êzidî îsal 11.salvegera fermanê bi xebateke pir girîng û dîrokî pêşwazî dike da ku bersiva hemû ferman û talanan bide. Piştî Banga Aşitî û Civaka Demokratîk a Rêber Apo û taybet peyama Ronesansa Êzidiyan, di nav civaka Êzidî û gelê Şengalê de ji bo hebûna azad nîqaş, nirxandin û lêgerînên nû destpê kirine.
Ji bo rê li ber nîqaşên Ronesansa Êzidiyan were vekirin, çarçoveyeke rast a nîqaş û nirxandinan were diyar bikin, rê û rêbazên guncav werin tesbît bikin, ev 3 mehin li Şengalê amadekariya konferanseke dîrokî tê kirin. Konferansa Ronakbirî ya Şengalê ya bi dirûşmeya ‘Banga Civaka Demokratîk bersiva 73 Fermana ye’ wê di 17-18’yê Tîrmehê de li Şengalê were lidarxistin. Konferans ji aliyê Akademiya Zanistên Civakî ya Abdullah Ocalan a Şengalê ve, tê lidarxistin. Wê ji derveyî Şengalê û ji nav Şengalê derdora 150 nivîskar, siyasetmedar, akademisyen, hunermend, oldar, kesayetên civakî, tevgerên jin û ciwanan beşdarî konferansê bibin. Mêvanên ku nikarin werin Şengalê jî wê bi rêya online nêrîn û peyamên xwe bigihînin konferansê.
Li Şengalê, li stargeha pîroz a Êzidiyan lidarxistina vê konferansê ji niha ve coş û kelecaneke mezin di nav gel de, her wiha di nav beşdarên konferansê de pêş xistiye. Ev axa pîroz ku ne dûr, 10 sal berê di destê çeteyên DAIŞ’ê de bû, ew Şengala ku li sûk û bazarên Rojhilata Navîn li pey keç, jin û zarokên xwe yên wenda ketî, ew Şengala ku hemû qube û silavgehên wê hatibûn hilweşandin, ew Şengala ku hê jî li benda vekirina bi dehan gorên komî ye; îro roj xwe gihandiye wê hêz û taqetê ye ku ji bo hebûna azad a Êzidiyan mazûvanî li nîqaşên Ronesansê, li nîqaşên vejînê bike. Yanî ji fermanê ber bi vejînê, ber bi ronesansa Rojhilata Navîn dimeşe.
DI NAV 2 ROJAN DE 9 MIJARÊN ESASÎ WERIN NÎQAŞKIRIN
Konferansa ku wê 2 rojan berdewam bike xwedî navorekeke têr û tijî ye. Bi giştî di 9 sernavan de wê hem paşeroja civaka Êzidî, hem rewşa wê ya di roja me de hem jî siberoja wê di çarçoveyeke çandî-dîrokî-civakî de were nirxandin.
Roja yekemîn a konferansê wê bi peyama Rêveberiya Xweser a Şengalê destpê bike. Piştre sînevîzyonekî girêdayî têkoşîna civaka Êzidî û berxwedana Şengalê were temaşekirin. Dîsa peyamên hem sazî û kesayetên li derveyî Şengalê hem jî peyamên ji nav Şengalê yên ji bo konferansê werin xwendin. Piştî axaftin û peyamên destpêkê wê di 10 mijarên cûda de nîqaş werin meşandin. Di her mijarek de, komîsyonek wê gotara xwe pêşkeş bike, mêvanên ku nekarîne beşdarî konferasnê bibin wê bi rêya online gotarên xwe pêşkeş bikin. Piştî pêşkeşkirina gotaran, wê beşdarên konferansê jî bi pirs û nirxandinên xwe beşdarî her mijareke konferansê bibin.
Mijarên ku wê di roja yekemîn a konferansê de werin nîqaşkirin ev in;
-Di Herikîna Dîrokê de Hebûna Civakî ya Êzidiyan
-Di Çarçoveya Çand-Bawerî û Felsefê de Êzidî û Ezdatî
-Weke Cewher û Bermahiya Civakê Heqîqeta Jinan Bi Jineolojî Ronîkirin
-Di Nav Talan û Qirkirinê de Rastiya Welat-Welatparezî û Ekolojî
-Zîhniyeta Fermanê, Rastiya Qirkirina Fîzîkî û Çandî
Mijarên ku wê di roja duyemîn a konferansê de werin nîqaşkirin ev in;
-Di Civaka Êzidî de Parastina Cewherî û Çanda Berxwedanê
-Di Ronesansa Êzidiyan de Xebatên Zanistên Civakî
-Ronesans, Ciwan û Ciwantî
-Banga Aşitî û Civaka Demokratîk / Pêngava Ji Rêber Apo re Azadî Ji Şengalê Re Xweserî
Li derveyî van mijaran, dibe ku hin peyam û gotarên taybet jî bigihîn konferansê. Her wiha di açrçoveya nîqaş, nirxandin û pêşniyaran de dibe ku hin biryarên girîng jî di konferansê de werin girtin. Konferansa Ronakbirî ya Şengalê wê bi xwendina encamnameyê bi dawî bibe.
