Li gorî rojnameya The Jerusalem Post, Serokwezîrê Îsraîlê Benjamin Netanyahu biryar daye ku bi tevahî Xezeyê dagir bike û li deverên ku dîlgirtî lê ne operasyonekê bide destpêkirin. Li gorî nûçeya Ynet’ê ku xwe dispêre çavkaniyên nêzî serokwezîr Netanyahu, Serokê DYE’yê Donald Trump ev plan erê kiriye.
Di civîna kabîneyê de, Netanyahu sê armancên şer dubare kir û wiha rêz kir, “Têkbirina dijmin, rizgarkirina dîlgirtiyan û rakirina Xezeyê ji gefê li ser Îsraîlê.”
Wezîrê Derve yê Îsraîlê Gideon Saar, diyar kir ku ew dixwazin mijara dîlgirtiyan bixin rojeva navenda cîhanî û ji bo vê ji Konseya Ewlekariyê ya Neteweyên Yekbûyî daxwaza rûniştinek taybet kir.
Desthilata Filistînî bi tundî planên dagirkirinê şermezar kir û bang li civaka navneteweyî kir ku bi lezgînî mudaxele bike.
Li aliyê din, li Îsraîlê, dijberiya li dijî siyaseta şer zêde dibe; rayedarên ewlehiyê û malbatên dîlgirtiyan daxwaz dikin ku zext li ser Netanyahu were kirin.
Niha li Xezeyê 49 dîlgirtî hene û herêm krîzeke mirovî ya giran dijî.
