Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) li qada Îtfaiyê ya navçeya Cizîrê ya Şirnexê şahiya “Aştî û civaka demokratik” li dar xist. Dayikên Aştiyê, Berdevka DEM Partî û parlamentera Şirnexê Aysegul Dogan, parlamenterên DEM Partî yên Şirnexê Newroz Uysal Aslan, Mehmet Zekî Îrmez, rêxistinên DBP’ê, DEM Partî yên Şirnexê û navçeyên wê û gelek welatî tevlî şahiyê bûn.
Şahî ji bo cangoriyên azadî û demokrasiye bi deqîqeyeke rêzgirtinê destpê kir. Piştî rêzgirtinê Hevserokê DBPê yê Şirnexê Sekvan Kiliç û Hevserokê DEM Partî yê Şirnexê Ramazan Uysal li ser dike gel silav kirin û gotin ku divê hemû gel xwedî li banga Rêberê Gelê Kurd Abdullah Ocalan a Aştî û Civaka Demokratîk derbikevin.
Piştre jî Berdevka DEM Partî Aysegul Doğan axivî û bi lêv kir ku ew li vir peyama xwedîderketina pêvajoya Aştî û Civaka Demokratîk didin û wiha got: “Raste me êşên mezin dîtin lê niha em ji bo destpêkeke nû amade ne. Piştî banga Rêberê Gelê Kurd Abdullah Ocalan di 11’ê Tirmehê de me li Silêmaniyê dîrokeke nû dît. Rûpeleke nû vêbû. Şewazên têkoşînê diguherin. Ew şewazên nû rêxistinbûyineke nû dixwazê. Di serî de divê em tîfaqa nav xweyî ava bikin. Divê em li xwe bawer bibin. Em miletekî pêşeng in. Divê em xwe rêxistin bikin. Hêza me şert û mercên nû derxistine. Van şert û mercên nû jî derfeta aştiyeke mayînde derxistiye holê. Divê vê derfetê baş bê bikarbînin. Me berdêlên mezin dan. Lê niha dîrokeke nû li pêşiya me ye. Em dixwazin aştiyeke hemû kes wekhev bibin, nasnameya me û hemû pêkhateyan û baweriyan bên naskirin. Em ê rojên xweştir bibînin. Lê ji bo wê rêxistinbûyin pir girîngê ji bo me. Rêxistinbûyîn wê bibe heza me.”
Piştî axaftinan Koma Avazên Botan derketin ser dikê û stranên xwe pêşkesî gel kirin. Welatiyan jî bi çoş guhdarî stranan kirin. Dû re jî Koma Sterkên Cûdî derket li ser dikê û bi stranên xwe gel coşandin. Welatiyên tevlî şahiyê bû bi gerandina govendê, çepikan û berzkirina dirûşmeyan tevlî stranan bûn. Şahî bi stran û gerandina govendê bi dawî bû.
