Xwedêda Çûkê ku weke berbijêrê parlementoya Iraqê li ser kota Êzdiyan hate qeydkirin û di heman demê de midûrê nahiya Sinûnê ye, ji ANF’ê re axivî û diyar kir ku namzetiya wî ji aliyê Komisyona Hilbijartinan a Iraqê ve hatiye betalkirin. Xwedêda Çûkê ev yek weke neheqî pênase kir û ragihand ku di sala 2020’an de jî ji ber zextên hin aliyan, careke din endamtiya wî hatibû betalkirin.
Çûkê destnîşan kir ku beriya xwe berbijêr bike, wî hemû karên yasayî temam kiribûn û got, “Lê mixabin hin aliyên siyasî bi giliyeke kevin careke din namzetiya min betal kirin. Ev yek ne di berjewendiya tu kesî de ye.”
Li gorî Çûkê, biryara betalkirina namzetiya wî di rûniştineke taybet de hatiye girtin. Wî weke delîl jî ev yek nîşan da: “Biryara hatî girtin tenê li ser min hate girtin û belavkirin, ji ber ku kesên beriya min dihatin dûrxistin bi lîsteyan dihatin belavkirin, lê ya min tenê bû.” Çûkê anî ziman ku ev yek nîşan dide ku destê derve di betalkirina namzetiya wî de hene û biryarek siyasî ye.
Xwedêda Çûkê di dawiya axaftina xwe de ragihand ku ew biryara derbarê wî de derketiye red dike û got, heta dawiyê jî ew ê têkoşînê bike.
