Komîsyona Jîngêhê ya Kongreya Neteweyî ya Kurdistanê (KNK) têkildarî şewata li çiyayê Aviyerê daxuyaniyek da û şehîdên jîngehparêz bibîr anî û polîtîkayên qirkirina xweza û civakî ya Îranê şermezar kir.
Daxuyanîya Komîsyona Jîngehê ya KNK’ê bi vî rengî ye:
Li nêzîkî bajarê Sineyê agir bi Çiyayê Aviyerê ket û hejmarek ji çalakvanên jîngehparêz yên ku ji bo kontrolkirina agir çûbûn bilindahiyên Aviyerê şehîd û birîndar bûn.
Bi navê Komîsyona Jîngehê ya KNK’ê, em sersaxiyê ji malbatên wan sê çalakvanên jîngehê, şehîdan: Hamed Muradî, Çiyako Yûsifînejad û Xebat Emînî re dixwazin, ku ji bo parastina jîngeh û niştîmana me canê xwe feda kirin. Her wiha em ji birîndaran re jî ku di bin çavdêriya bijîşkî de ne, şîfayê dixwazin. Ev mirovên fedakar mînakek berbiçav a hesta berpirsiyariyê û têkoşîna dilsoz ji bo jîngeha Kurdistanê ne. Bila bîranîn û navê wan her tim bilind be û cangorî namirin.
Em baş dizanin ku rejîma Komara Îslamî ya Îranê ne tenê bi awayekî sîstematîk jîngeha Rojhilatê Kurdistanê talan kiriye, di heman demê de tu hewldanek ji bo parastina wê nîşan nedaye û bi zanebûnî ji bo wêrankirina wê dixebite. Girtina çalakvanên jîngehê û cezayên wan ên zindankirinê, şewitandina daristanan û nebûna her planekê ji bo parastina jîngehê, ne tenê nîşaneyên xemsariya rayedaran in, di heman demê de hewldaneke qestî ji bo wêrankirina xwezaya Rojhilatê Kurdistanê ne. Ev di çarçoveya têkiliyek newekhev û neqanûnî ya navbera hêz û xwezayê de ye, ku jîngeh ji bo rûbirûbûna gelê Kurd veguherandiye çekekî. Ji ber vê yekê, em têkoşîna ji bo jîngehparêzîyê wekî mijarek siyasî û bingehîn dibînin, ji ber ku em di bin sîstemeke wisa de ne ku jîngeha Kurdistanê veguherandiye qadeke cezakirinê.
Em ji rayedarên Komara Îslamî re radigihînin ku xemsariya têkildarî şewitandina jîngeha xwezayî û daristanan, wêrankirina deverên parastî, destdirêjiya li ser çavkaniyên avê û zirardayîna jîngehê ne tenê li dijî jîngeh û gelê Kurd e, di heman demê de li dijî jiyan, dîrok û mirovahiyê ye jî.
Wekî Komîsyona Jîngehê ya KNK’ê, heta ku şewitandin, talankirin û wêrankirina xwezaya me bi dawî nebe em ê têkoşîna xwe ya sivîl û jîngehparêz bidomînin. Em piştgiriya xwe ya ji tevahiya rêxistin û encumenên jîngehparêz, komên dilxwaz, hemû kesên ku dilsoz in û jîngeh û Kurdistanê diparêzin re dubare dikin.
Em bang li gelê xwe û hemû jîngehparêz û mirovdostan dikin ku bibin yek û fişareke navneteweyî li ser Komara Îslamî bikin, da ku pêşî li talankirin û wêrankirina jîngehê li Rojhilatê Kurdistanê bigirin. Ji bo parastina xwezayê û dabînkirina jiyaneke azad û ji bo gelê Kurdistanê û gelên cîhanê.
Jîngeha me niştîmana me ye, erkê me ye ku em wê biparêzin!’’
