Yên ku beriya civîna bilind a NATO’yê ya 7-8’ê Tîrmehê bêyî ku tiştek hatibe kirin bi texmîna “wê çalakiyê bikin” a polîsan bi rengekî bêhiqûqî hatin binçavkirin û girtin, bi rengekî kêfî bi mehan e li girtîgehan dîl têne girtin. Yek ji wan jî erdhejzede Halîl Hakût e. Halîl Yakût 23’ê Hezîrana 2026’an li Mûglayê ku bi kîlometreyan dûrî Enqereyê ye, bi texmîna “wê çalakî bikira” hate binçavkirin. Di îdîanameya têkildarî Halîl Yakût de li gel parvekirinên li ser medya dîjîtal ku tê îdîakirin têkildarî NATO’yê kiriye, dosyaya ku jê beraat kiribû hate bicihkirin. Li gel vê yekê jî diyar e ku dadgerî ji aliyê “nîşaneya sûc” ve nehatiye qanihkirin ku dosya li nava dadgeran digere. Bi hinceta dosyayên berê îdîaname bi îdîaya “endametiya rêxistinê” hate amadekirin. Destpêkê Dageha Ceza ya Giran a 14’emîn a Stenbolê biryar da ku darizandin ne erka wê ye û piştre ji Mûglayê re şand. Niha jî Dadgeha Ceza ya Giran a Mûglayê ya 2’yemîn heman biryar da û ragihandin ku darizandin ne erka wê ye û ji Hatayê re şand. Dayika Halîl Yakût, Gulten Yakût ji ANF’ê re axivî û zilma ku bi mehan e li kurê wê tê kirin bi gotina “Li Stenbolê sûc nedîtin, şandin Mûglayê. Li Mûglayê nedîtin şandin Hatayê. Ji jiyana kurê min didizin” pênase kir û nerazîbûn nîşan da.
Gulten Yakût ku ji ji ber erdheja Mereşê mala wê ya li Antakyayê hilweşiya, ji aliyekî ve hewl dide birînên xwe yên ji ber erdhejê bipêçe, li aliyê din jî bi rewşa kurê xwe Halîl Yakût re mijûl dibe. Yakût diyar kir ku kurê wê bi bahaneya civîna bilind a NATO’yê ya dawî zêdeyî 4 meh in girtî ye û anî ziman ku bi hinceta parvekirinên ji hesabên cuda yên li dijî NATO’yê kurê wê Halîl 23’ê Hezîranê li otogar a Mûglayê hate binçavkirin û girtin.
Gulten Yakût got, “Bi gotina ‘sûcên katalog’ biryarê didin ku girtî bimîne. Û bi biryara bê erkiyê jî dosyayê dişînin dadgehên li bajarên cuda. Dosya li nava dadgehan digerin, bi vî rengî ji jiyana kurê min didizin.”
Yakût xwest, girtîhiştina bêhiqûqî ya kurê wê bi dawî bibe û anî ziman ku bûyerên diqewimin ne tenê malbata wê, bandorê li jiyana temamî ya Halîl dike. Yakût destnîşan kir ku ev yek binpêkirina mafên mirovan e û bi vê gotinê nerazîbûn nîşan da: “Gelo tu dikare hesabê deqeyeke ragirtina wî ya li girtîgehê bide? Bi texmîna ku li hemberî civîna bilind a NATO’yê wê çalakiyê bike hate girtin ku ti delîlên vê yekê piştrast bike nîne. Tu çawa dikare vî zarokî ragirtî bihêle? Gelek meh derbas bûn, tiştekî bi navê civîna bilind a NATO’yê nema. Bûyerên berê digerînin û dixin nava heman dosyayê. Tu yê heta bi hetayê vî zarokî girtî bihêle? Mirovên diz, yên ku welêt dişêlînin, fonperest, tecawizkar li derve ne, lê belê kurê min ê ku gêrîkek jî neêşandiye ji ber ku muxalîfê vê sîstemê ye girtî ye. Yanî sûcê wî muxalîfbûn e. Kurê min tiştekî kesî nedizî, kes nekuşt. Kengî kêr an jî çekek di destê kurê min de hate dîtin? Gelo te dît ku rojekê li yekî xist? Ez dixwazim ku ev êşkence bi dawî bibe û kurê min tavilê azad bibe.”
