Konseya Ewlehiyê ya Neteweyên Yekbûyî (BMGK) li ser zêdebûna xebatên DAÎŞ’ê yên li Sûriye, Iraq û Efrîkayê kete nava liv û tevgerê. Ofîsa Dijî Terorê ya BMGK’ê di demên dawî de raporek weşand. Di raporê de hate eşkerekirin ku rêxistinê hem bandora xwe li ser qadê zêde kiriye û hem jî di aliyê îdeolojîk û teknolojîk xwe nû kiriye.
Di raporê de hate gotin ku lîderên nû û ciwan di nav rêxistinê de derketine pêş û ev lîder zekaya dîjîtal jî di nav de teknolojiya modern ji bo propagandayê û peydakirina çekdaran bi kar tînin.
Di raporê de hat destnîşankirin ku çeteyên DAÎŞ’ê piştî hilweşîna rejîma Sûriyeyê dest danîne ser stokên çekên giran û piştî HTŞ hate desthilatdariyê bi berdana 500 milîtanan tevkariya ji nû ve rêxistinkirinê kirine.
Hate ragihandin ku di demên dawî de nêzîkî 90 êrîş li deverên di bin kontrola Hêzên Sûriya Demokratîk (QSD) de pêk anîne û ji baregehên herêma çolê (Badiya) ber bi taxên derdora Şamê ve belav bûne.
Di raporê de hate diyarkirin ku nêzîkî 3,000 çekdarên DAÎŞ’ê li ser sînorê Iraqê ji nû ve xwe ava bûne û bi parastina hebûna xwe li herêmê hatine asta metirsiyê.
Di raporê de rewşa ewlehiya Sûriyeyê wekî “li ber şikestinê ye” bi nav kir. Hate destnîşankirin ku binesaziya parastin û ewlehiya Sûriyeyê ji binî ve hilweşiyaye û bi dehan komên tundrew û çekdarên biyanî herêmê kontrol dikin. Di raporê de hişyariya ku gotinên mezhebî û teşwîqkirinê rê li ber belavbûna îdeolojiya DAÎŞ’ê vedike û bandora li ser qadên sivîlan hêsan dike.
Di raporê de hate diyarkirin ku bandora DAÎŞ’ê li herêma Sahel a Efrîkayê zêde bûye. Hate destnîşankirin ku DAÎŞ bi taybetî li herêmên ku ji ber derbeyên leşkerî dihejin bi rehetî tevdigere û piştgiriya darayî ya li derveyî sînor berdewam dike.
