Berdevka Meclisa Jinan a Partiya Demokrasî û Wekheviyê ya Gelan (DEM Partî) Halîde Turkoglû tekildarî rojeva jinan li Navenda Giştî ya DEM Partiyê daxuyanî da. Halîde Turkoglûyê, bi boneya 32’yemîn qetilkirina DEP’ê Mehmet Sîncar bi bîr anî û got: “Kuştina Sîncar, êrişeke li dijî daxwaza aştî, wekhevî û azadiyê bû. Faîlên rast qet nehatin darizandin. Dîroka nêz a welêt, dîroka kuştinên nediyar û parastina hêzên tarî ye.”
Bi domdarî Halîde Turkoglûyê bal kişand ser Banga Aştî û Civaka Demokratîk a Rêber Apo û got: “Banga Ocalan banga aştiyê ye. Ev bang, ji bo hevrûbûna dîrokê û dayîna hêviyê ji Dayikên Şemiyê, Dayikên Aştiyê û hemû kesan bû. Em jin ji bo mezinkirina vê hêviyê û avakirina aştiyeke birûmet dixebitin. Çareseriya demokratîk a pirsgirêka Kurd bi rûbirûbûna heqîqetan re pêkan e.”
Di berdewamê de Halîde Turkoglûyê gefên rêyedarên Tirkiyeyê yên li dijî Bakur û Rojhilatê Suriyeyê bi bîr xist û ev nirxandin kir: “Komîsyona li Meclisê divê Dayikên Aştî û Şemiyê bibihîze û gavên pêwîst zû bavêje. Aştî ne tenê ya di navbera mêran de ye; ev banga aştiyê ya bi hemû Kurdan, jinan û jiyana nû ya li Bakur û Rojhilatê Sûriyeyê re ye. Divê êrişên li ser maf û destkeftiyên Kurdan rawestin, zimanê dayikê bê parastin, siyaseta qeyûman bi dawî bibe û demokrasiya herêmî bê xurtkirin. Şoreşa Rojava gef nîne. Şerên li Rojhilata Navîn jiyana jinan tarî dikin. Êrişên li ser jinên Efxan, Îranî, Filistînî, Siwêda û Laziqiyê nayên qebûlkirin. Em Şoreşa Rojava ya bi pêşengiya jinan diparêzin. Ev şoreş ji bo Tirkiyeyê ne gef e; gefa rastî çeteyên ku jinên Elewî û Dûrzî dikujin in. Divê îradeya gelên Sûriyeyê bê naskirin.”
Halîde Turkoglûyê, diyar kir ku li Tirkiyeyê di meha Tebaxê de 23 jin hatinê kuştin û 44 jin jî bi awayekî gumanbar jiyana xwe ji dest dane. Halîde Turkoglûyê, wiha dom kir: “Di bingeha van kuştinan de polîtîkayên piştgiriya desthilatiya zilaman dike hene. 36 milyon çekên bêrûxset hatinê tespîtkirin. 36 milyon çekên bêrûxst jiyana jinan dixin metirsiyê. Siyasetên ku çekan belav dikin û çetebûnê teşwîq dikin, jinan dikin armanc. Doza edaletê ya Rabîa Naz 7 sal in bêbersiv e. Em ê destûr nedin ku dosyeyên jinên kuştî bên girtin.”
Halîde Turkoglûyê bertek nîşanî fetwayên Serokatiya Karên Diyanetê ya ku jinan hedef digire da û axaftina xwe wiha qedand: “Diyanet jinan hedef digire. Diyanet bi xutbeyên xwe ve dijminatiya jinan gur dike û mafên jinan binpê dike. Ev sazî, baweriyê, ji bo hedefnîşandana jinan bikar tîne. Mafên jinan ne mijara xutbeyan e. Armanca wan ew e ku jinan bêdeng bikin û di malê de bigirin. Em ê li hemberî van polîtîkayan têbikoşin. Mafên tenduristiyê yên jinan tên astengkirin. Li Nexweşxaneya Meramê, bijîşkekê ji ber cilên keçekê wê muayene nekir. Ev yek, nîşaneya rizîbûna polîtîkayên tenduristiyê ye. Em ê vê yekê bişopînin. Em ê teşhîr bikin. Ji bo çareseriyên mayînde, divê ÎLO 190 bê îmzekirin û li dijî tundiyê têkoşîn bê mezinkirin. Em ê aştiyê bi pêşengiya jinan ava bikin. Jin, ji bo aştiyeke birûmet, li dijî xizanî, bêkarî û polîtîkayên zayendperest têdikoşin. Em ê li her derê têkoşîna xwe bilind bikin û aştiyê bi pêşengiya jinan ava bikin.”
