Pêşbirk di çar beşan de bi rengê Nûçeyên Tirkî, Nûçeyên Kurdî, Nûçeyên Dîmen û Wêne hate lidarxistin.
Di beşa Nûçeyên Tirkî de nûçegihana Ajansa Mezopotamyayê (MA) Zeynep Dûrgût hêjayî xelata yekemîntiyê hate dîtin.
Zeynep Dûrgût bi nûçeya xwe ya bi sernavê “Li Şirnexê şerê taybet: ‘Çeteyek Fihûşê’ ya ku Çawişên Pispor jî di nav de ne” ji ber polîtîkayên şerê taybet ên li dijî jinan teşhîr kiriye û tevî gefan rojnamevaniya domandiye, hêjayî xelata yekem hatiye dîtin.
Di beşê Nûçeyên Kurdî de nûçegihanên Jinnewsê Rojda Aydin û Dîlan Babat bi nûçeyên xwe ya bi sernavê “Kiryarê ku destdirêjî 12 zarokan kir, tiryakê ji ku peyda dike?” hêjayî xelata yekemîntiyê hatin dîtin.
Di beşa Nûçeyên bi Dîmen de Derya Ren bi nûçeya xwe ya “Bi dîmenan tundiya dewletê ya li Silopiyayê” ku tundiya dewletê ya li Silopiyayê belge kir, hêjayî xelata yekemîntiyê hate dîtin.
Wêneyê bi navê “Hafizaya bêdawî” yê Fatoş Sarikaya ya ji Ajansa Nûçeyan a Pîr (PÎRHA) hêjayî xelata yekemîntiyê hate dîtin. “Hafizaya bêdawî” êşa Komkujiya Sêwasê vedibêje.
Dayikên Aştiyê ku bi salane dest ji têkoşîna xwe ya ji bo aştiyê bernadin, hêjayî Xelata Rûmetê ya Îsal hatin dîtin.
Roja Çarşemê 8’ê Cotmehê li Amedê di saet 19.00’an de wê li Çand Amed (Navenda Çand û Kongreyê ya Sezaî Karakoç) merasîmek were lidarxistin û xelat bên dayîn.
