Ji parlamenterên hiqûqnas ên DEM Partiyê Alî Bozan anî ziman ku divê hiqûqa xwişk û biratiyê ya hezar salî bê avakirin û ev yek nivîskî be.
Bozan ji ANF’ê re axivî û diyar kir ku Tevgera Azadiyê ya Kurd di nava salekê de nêta xwe ya baş a ji bo çareseriyê, samîmiyet û biryardariya xwe nîşan da, lê belê aliyê dewletê ji daxuyaniyan wêdetir gav neavêtiyê. Bozan got, “Çareseriya meseleyê êedî ji bo her kesên li vê erdnîgariyê mecbûrî bûye. Ji ber vê mecbûriyetê jî ji her demê bêhtir bi hêvî me.”
PÊWÎSTIYÊN QONAXA DUYEMÎN A PÊVAJOYÊ
Bozan anî ziman ku di qonaxa duyemîn a pêvajoyê de divê êdî sedemên pirsgirêka Kurd bêne nîqaşkirin û got, “Sedema rabûna PKK’ê ma ne înkarkirina hebûn, ziman û nasnameya gelê Kurd bû? Divê em vê sedemê ji holê rakin. Heta ku sedem ji holê neyên rakirin, gavên ji bo encamgirtinê bêne avêtin wê mayinde nebin, bi taybetî jî hin gavên weke azadiya girtiyên siyasî û vekişandina qeyûman, eger sedem ji holê neyên rakirin piştî salekê careke din dikarin bêne betalkirin. Lewma girîng e gavên welê bêne avêtin ku sedemên meseleya Kurd ji holê rakin.”
HIQÛQA XWIŞK Û BIRATIYÊ DIVÊ BI NIVÎSKÎ BE
Bozan destnîşan kir ku ji bo pêvajo çareseriyeke mayinde biafirîne divê ‘xetên sor’ li aliyekî bê danîn, hiqûqa lihevkirin, xwişk û biratiyê li ser zemîneke nivîskî bê rûniştandin û got, “Eger em qala xwişk û biratiya hezar salî dikin, divê hiqûqa wê xwişk û biratiya hezar salî bê avakirin. Ew hiqûq jî divê bi nivîskî be.” Bozan her wiha destnîşan kir ku pêwîstiyeke girîng e ku kesên çek danîne tevlî siyaseta demokratîk bibin û diyar kir ku ev yek nabe bê taloqkirin.
