Mîhrîcana Fîlman a Rojava ya Navneteweyî ya 5’emîn, di roja 3’yemîn de didome. Di mîhrîcanê de sînemager Omer Leventoglu semînerek bi navê “Di sînemaya Kurd de beşek; sînemaya Bakur” da. Semîner li hola Navenda Çand û Hunerê ya Mihemed Şêxo pêk hat.
Omer Leventoglu bal kişand ser sînemageriya li Bakurê Kurdistanê û çêkirina fîlman û her wiha rewşa çêkirina belgefîlman û fîlmên metrajdirêj.
Leventoglu got: “Yilmaz Guney avakarekî sînemeya Kurdî ye, rast e bi zimanê Tirkî fîlm çêkirine, lê em dikarin diyar bikin ku emrê wî têrê bikira projeyeke wî li ser têkoşîna Kurdan jî hebû. Yilmaz Guney şêwazek ji bo sînemeya kurdî ava kiriye. Ji ber ku nêrînek, hişmendiyek ava kiriye; di sînemayê de xweşikbûn çi ye, felsefe çi ye û bi kîjan aktoran û kamerayan li çîrokan dinêre.”
Omer Leventoglu anî ziman ku bandora neyînî ya dewleta Tirk li ser sînemaya Bakur gelek e û gotinên xwe wiha bi dawî kirin: “Hin sînemagerên Kurd di bin bandora polîtîkayên dijmin de ne, li ser hişmendiya pergalê fîlman çêdikin, lê behsa çîrokên Kurdan dikin. Hemû xebatkarên wan Kurd in jî, lê ji ber ku di bin tesîra dijmin de mane, li ser sînemaya Kurdî çênakin. Nêrîn û hişmendî yên dagirkeriya Tirk in. Mînakên wisa gelek in. Li Bakur sînemagerên li ser hişmendiya şoreşgerî ne pir zêde ne. Lê potansîyeleke gelekî xurt heye û ji bo ku em vê potansîyelê derxin hole, xebat pêwîst in.”
